ભારતની વધુ એક કૂટનીતિક જીત, ઈરાને 5 ભારતીયોને છોડ્યા
અમદાવાદ: કતારથી ભારતીય નૌકાદળના 8 ભૂતપૂર્વ સૈનિકોની સુરક્ષિત વાપસી બાદ ભારતને વધુ એક મોટી રાજદ્વારી સફળતા મળી છે. ઈરાને ઈઝરાયેલ સાથે જોડાયેલા પોર્ટુગીઝ કાર્ગો જહાજમાં સવાર 5 ભારતીયોને મુક્ત કર્યા છે. ભારતીયોની મુક્તિ માટે નવી દિલ્હીથી સતત રાજદ્વારી પ્રયાસો કરવામાં આવી રહ્યા હતા. હવે તેહરાને 5 ભારતીયોને મુક્ત કર્યા છે. ઈરાનમાં ભારતીય દૂતાવાસના અધિકારીઓએ આ જાણકારી આપી છે.
મહત્વનું છે કે, ઈરાને પોર્ટુગીઝ ફ્લેગ શિપ MSC Aries ના 7 ક્રૂ મેમ્બર્સને મુક્ત કર્યા છે. આ માલવાહક જહાજ 13 એપ્રિલે જપ્ત કરવામાં આવ્યું હતું. પોર્ટુગલના વિદેશ મંત્રાલયે જણાવ્યું હતું કે, મુક્ત કરાયેલા લોકોમાં 5 ભારતીયો, એક ફિલિપિનો નાગરિક અને એક એસ્ટોનિયન નાગરિકનો સમાવેશ થાય છે. આ કન્ટેનર જહાજને ઈરાન દ્વારા ઈઝરાયેલ સાથેના જોડાણના કારણે જપ્ત કરવામાં આવ્યું હતું. પોર્ટુગલે જપ્ત કરાયેલા જહાજમાંથી સાત ક્રૂ મેમ્બર્સને છોડાવવાનું સ્વાગત કર્યું છે.
આ પણ વાંચો: વટવામાં ભાડે આપેલા શેડની ડિપોઝિટ પાછી માંગતા દંપતીએ કરી મહિલાની હત્યા
રિવોલ્યુશનરી ગાર્ડે કબજે કર્યું હતું
પોર્ટુગલે હવે બાકીના 17 ક્રૂ સભ્યોને તાત્કાલિક મુક્ત કરવાની માંગ કરી છે. ઈરાનના ઈસ્લામિક રિવોલ્યુશનરી ગાર્ડ કોર્પ્સ નેવીએ 13 એપ્રિલના રોજ સ્ટ્રેટ ઓફ હોર્મુઝ નજીક કન્ટેનર જહાજ MSC Aries કબજે કર્યું હતું. વિમાનમાં 17 ભારતીય નાગરિકો સવાર હતા. આ જહાજ છેલ્લીવાર 12 એપ્રિલે દુબઈના કિનારે હોર્મુઝ સ્ટ્રેટ તરફ જતું જોવા મળ્યું હતું. આ જહાજ ઈઝરાયેલ અને ઈરાન વચ્ચેના ઉગ્ર સંઘર્ષ દરમિયાન કબજે કરવામાં આવ્યું હતું.
ઈરાને શું કહ્યું?
જહાજને જપ્ત કર્યા પછી, ઈરાનના વિદેશ મંત્રાલયના પ્રવક્તાએ કહ્યું, ‘તે નિશ્ચિત છે કે આ જહાજ યહૂદી શાસન સાથે જોડાયેલું છે.’ 14 એપ્રિલે વિદેશ મંત્રી એસ જયશંકરે તેમના ઈરાનના સમકક્ષ હોસૈન અમીર-અબ્દુલ્લાહિયન સાથે ભારતીય ક્રૂ મેમ્બરની મુક્તિ અંગે ચર્ચા કરી હતી. ક્રૂની સ્થિતિ અંગે ચિંતા વ્યક્ત કરતા ડૉ. જયશંકરે ઈરાન પાસે મદદ માંગી હતી.
ઈરાને છૂટ આપી હતી
ઈરાનના વિદેશ મંત્રીએ કહ્યું હતું કે ભારતીય અધિકારીઓને ક્રૂને મળવા દેવામાં આવશે. જહાજમાં ભારતીય ક્રૂ મેમ્બરની સાથે ચાર ફિલિપિનો, બે પાકિસ્તાની, એક રશિયન અને એક એસ્ટોનિયન હતા. કેડેટ એન ટેસા જોસેફ, 17 ભારતીય ક્રૂ સભ્યોમાંની એકમાત્ર મહિલા, ઈરાની દળોએ ટેન્કરને કબજે કર્યાના દિવસો પછી 13 એપ્રિલે મુક્ત કરવામાં આવી હતી. અધિકારીઓને બાકીના લોકોને મળવા દેવાયા હતા.
