પંજાબના CM ભગવંત માન નહીં જઈ શકે પેરિસ, વિદેશ મંત્રાલયે મંજૂરી ન આપી

Punjab: કેન્દ્ર સરકારે પંજાબના મુખ્યમંત્રી ભગવંત માનને પેરિસ જવા દીધા ન હતા. સીએમ માન આજે પેરિસ જવાના હતા પરંતુ કેન્દ્ર દ્વારા તેમને પરવાનગી આપવામાં આવી ન હતી. વિદેશ મંત્રાલયે માનને પેરિસ જવાની મંજૂરી આપવાનો ઇનકાર કર્યો હતો.

સૂત્રોના જણાવ્યા અનુસાર સુરક્ષાના કારણોસર પરવાનગી આપવાનો ઇનકાર કરવામાં આવ્યો છે. મુખ્યમંત્રી કાર્યાલયને શુક્રવારે મોડી સાંજે યાત્રાની પરવાનગી ન મળવાની માહિતી મળી હતી. ઓલિમ્પિકમાં ભાગ લઈ રહેલી હોકી ટીમનો ઉત્સાહ વધારવા સીએમ માનને પેરિસ જવું હતું.

ભારતીય પુરૂષ હોકી ટીમનું શાનદાર પ્રદર્શન
ભારતીય પુરૂષ હોકી ટીમે પેરિસ ઓલિમ્પિક 2024માં અત્યાર સુધી શાનદાર પ્રદર્શન કર્યું છે. ભારતીય પુરુષ હોકી ટીમે ઓસ્ટ્રેલિયાને 3-2થી હરાવીને 52 વર્ષ બાદ ઓલિમ્પિકમાં ઐતિહાસિક જીત હાંસલ કરી છે. 1972 બાદ પ્રથમ વખત ભારતે ઓલિમ્પિક ગેમ્સમાં ઓસ્ટ્રેલિયાને હોકીમાં હરાવ્યું હતું. આ સાથે ભારતીય હોકી ટીમ ક્વાર્ટર ફાઈનલમાં પહોંચી ગઈ છે. પેરિસ ઓલિમ્પિકમાં ભારતીય હોકી ટીમ પાસેથી મેડલની અપેક્ષા છે. ભારતે 41 વર્ષ બાદ ટોક્યો ઓલિમ્પિકમાં હોકીમાં બ્રોન્ઝ મેડલ જીત્યો હતો.

આ પણ વાંચો: તાજમહેલમાં બે યુવકોએ કબરો પર ચઢાવ્યું ગંગાજળ, બબાલ થતા કરાઈ ધરપકડ

પેરિસ મેડલ ટેબલમાં ભારત 48માં નંબર પર છે
પેરિસ ઓલિમ્પિકમાં મેડલ ટેબલમાં ભારત 48માં નંબર પર છે. ભારતે અત્યાર સુધીમાં ત્રણ મેડલ જીત્યા છે. ભારતને શૂટિંગમાં ત્રણેય બ્રોન્ઝ મેડલ મળ્યા છે. મનુ ભાકરે ભારત માટે અત્યાર સુધીમાં બે બ્રોન્ઝ મેડલ જીત્યા છે. આ સિવાય સ્વપ્નિલ કુસાલેએ બ્રોન્ઝ મેડલ જીત્યો હતો.

મેડલ ટેબલમાં ચીન પ્રથમ સ્થાને છે જેણે કુલ 31 મેડલ જીત્યા છે. જેમાં 13 ગોલ્ડ, 9 સિલ્વર અને 9 બ્રોન્ઝ સામેલ છે. તે જ સમયે, ફ્રાન્સ 36 મેડલ સાથે બીજા સ્થાને છે. ઓસ્ટ્રેલિયા ત્રીજા સ્થાને (22 મેડલ) છે.

પેરિસ ઓલિમ્પિકના આઠમા દિવસે મનુ પર નજર
પેરિસ ઓલિમ્પિકના આઠમા દિવસે શનિવારે તમામની નજર મનુ ભાકર પર રહેશે. મનુ 25 મીટર પિસ્તોલ સ્પર્ધાની ફાઇનલમાં પડકાર આપશે. આ વખતે પણ તેની પાસેથી મેડલ જીતવાની આશા છે. મનુએ બે મેડલ જીત્યા છે અને આ વખતે તેની નજર મેડલની હેટ્રિક પર છે.