ઓલિમ્પિકમાં બે મેડલ જીતનારા ચોથા ભારતીય નિરજ ચોપરા

પેરિસઃ નિરજ ચોપરા ભલે પેરિસ ઓલિમ્પિકમાં સુવર્ણ ચંદ્રક ન મેળવી શક્યા હોય, પરંતુ તે ઓલિમ્પિકમાં બે મેડલ જીતનારા ચોથા ભારતીય ખેલાડી બની ગયા છે. નિરજ પહેલાં માત્ર કુસ્તીબાજ સુશીલ કુમાર, બેડમિન્ટન સ્ટાર પીવી સિંધુ અને શૂટર મનુ ભાકર આ સિદ્ધિ મેળવી શક્યા હતા. જો કે, નીરજ એથ્લેટિક્સમાં એટલે કે ઓલિમ્પિકમાં ટ્રેક એન્ડ ફિલ્ડમાં બે મેડલ જીતનારા પ્રથમ ભારતીય પણ છે.

નિરજ સિંધુ-મનુની યાદીમાં સામેલ
નિરજ પહેલાં સુશીલ કુમારે 2008માં બ્રોન્ઝ મેડલ અને 2012 લંડન ઓલિમ્પિકમાં 66 કિગ્રા વજન વર્ગમાં સિલ્વર મેડલ જીત્યો હતો. જ્યારે પીવી સિંધુએ 2016ના રિયો ઓલિમ્પિકમાં મહિલા સિંગલ્સ મેચમાં સિલ્વર મેડલ અને Tokyo 2020માં બ્રોન્ઝ મેડલ જીત્યો હતો. મહિલા શૂટર મનુ ભાકરે પેરિસ ઓલિમ્પિકમાં જ વ્યક્તિગત અને મિશ્ર સ્પર્ધાઓમાં બ્રોન્ઝ મેડલ જીત્યો હતો. હવે નીરજ પણ આ યાદીમાં સામેલ છે. આ ઓલિમ્પિક પહેલાં તેણે ટોક્યો ઓલિમ્પિકમાં ભાલા ફેંક સ્પર્ધામાં ગોલ્ડ મેડલ જીત્યો હતો.

આ પણ વાંચોઃ સિલ્વર મેડલ જીત્યા બાદ નિરજ ચોપરાની પ્રથમ પ્રતિક્રિયા, ઈજા વિશે આપ્યું મોટું નિવેદન

ત્યારે ટ્રેક અને ફિલ્ડમાં નોર્મન પ્રિચાર્ડે વર્ષ 1900માં ભારત માટે રમતી વખતે બે મેડલ જીત્યા હતા, પરંતુ તેઓ બ્રિટિશ મૂળના હતા. પ્રિચાર્ડે પુરુષોની 200 મીટર અને 200 મીટર હર્ડલ્સમાં બે સિલ્વર મેડલ જીત્યા હતા. નિરજનો સિલ્વર એથ્લેટિક્સમાં ભારતે જીતેલો ચોથો મેડલ હતો. પ્રિચાર્ડ અને નિરજના નામે બે-બે મેડલ છે.

પેરિસ ઓલિમ્પિકમાં ભારતનો પાંચમો મેડલ
નિરજનો મેડલ પેરિસ ઓલિમ્પિકમાં ભારતનો પાંચમો મેડલ હતો. નિરજ પહેલાં મહિલાઓની 10 મીટર એર પિસ્તોલ સ્પર્ધામાં બ્રોન્ઝ મેડલ, ત્યારબાદ મનુએ સરબજોત સાથે મળીને 10 મીટર એર પિસ્તોલ મિક્સ્ડ ટીમ ઈવેન્ટમાં બ્રોન્ઝ મેડલ જીત્યો હતો. સ્વપ્નિલ કુસલેએ પુરુષોની 50 મીટર રાઈફલ થ્રી પોઝિશનમાં બ્રોન્ઝ મેડલ જીત્યો હતો અને ભારતીય પુરૂષ હોકી ટીમે પણ બ્રોન્ઝ મેડલ જીત્યો હતો.

આ પણ વાંચોઃ નિરજે 6માંથી માત્ર એક જ થ્રો સાચો કર્યો છતાં સિલ્વર મેડલ જીત્યો

ડિફેન્ડિંગ ચેમ્પિયન નિરજે પેરિસ ઓલિમ્પિકની જેવલિન થ્રો ઈવેન્ટમાં સિલ્વર મેડલ જીત્યો હતો, પરંતુ પાકિસ્તાનના અરશદ નદીમે ઓલિમ્પિકમાં નવા રેકોર્ડ સાથે જીત મેળવી હતી. 26 વર્ષીય નિરજનો બીજો થ્રો તેનો એકમાત્ર માન્ય થ્રો હતો જેમાં તેણે 89.45 મીટરનો થ્રો કર્યો હતો, જે આ સિઝનનો તેનો સર્વશ્રેષ્ઠ થ્રો હતો. આ સિવાય તેના પાંચેય થ્રો ફાઉલ થયા હતા. તેણે ટોક્યોમાં 87.58 મીટરના થ્રો સાથે ગોલ્ડ મેડલ જીત્યો હતો.

નદીમના નામે ઓલિમ્પિક રેકોર્ડ
નદીમે 92.97 મીટરના બીજા થ્રો સાથે નવો ઓલિમ્પિક રેકોર્ડ બનાવ્યો છે. તેણે 91.79 મીટરનો છઠ્ઠો અને છેલ્લો થ્રો કર્યો હતો. 1992 બાર્સેલોના ઓલિમ્પિક બાદ પાકિસ્તાનનો આ પહેલો ઓલિમ્પિક મેડલ છે. આ પહેલા નિરજે હંમેશા નદીમને દસ મેચમાં હરાવ્યો હતો. નિરજ ત્રીજો ભારતીય ટ્રેક અને ફિલ્ડ એથ્લેટ બન્યો છે અને સતત બે ઓલિમ્પિક વ્યક્તિગત ઇવેન્ટ મેડલ જીતનારો પ્રથમ ખેલાડી બન્યો. તેના પહેલા કુસ્તીબાજ સુશીલ કુમાર (2008 અને 2012) અને બેડમિન્ટન ખેલાડી પીવી સિંધુ (2016 અને 2020) આ સિદ્ધિ મેળવી ચૂક્યા છે. નદીમને હેંગઝોઉ એશિયન ગેમ્સમાં નિરજ સાથે હરીફાઈ કરવાનો હતો, પરંતુ ઈજાના કારણે તે છેલ્લી ઘડીએ ખસી ગયો હતો. નિરજે તેને 2018 એશિયન ગેમ્સ અને કોમનવેલ્થ ગેમ્સમાં હરાવ્યો હતો.