ડોનાલ્ડ ટ્રમ્પે PM મોદીને ગણાવ્યા ‘ફેન્ટાસ્ટિક મેન’, કહ્યું- આવતા અઠવાડિયે થશે મુલાકાત
PM Modi: પીએમ મોદી વાર્ષિક ‘ક્વાડ’ સમિટમાં ભાગ લેવા અને સંયુક્ત રાષ્ટ્ર મહાસભામાં ‘સમિટ ઓફ ધ ફ્યુચર’ને સંબોધિત કરવા 21 સપ્ટેમ્બરથી ત્રણ દિવસની અમેરિકાની મુલાકાતે જશે. પૂર્વ અમેરિકી રાષ્ટ્રપતિ ડોનાલ્ડ ટ્રમ્પે કહ્યું કે તેઓ આવતા અઠવાડિયે વડાપ્રધાન નરેન્દ્ર મોદીને મળશે.
ચૂંટણી પ્રચાર દરમિયાન ડોનાલ્ડ ટ્રમ્પે કહ્યું કે તેઓ (PM મોદી) આવતા અઠવાડિયે મને મળવા આવી રહ્યા છે. મોદી એક મહાન નેતા છે. જો કે, તેમણે તેમની બેઠક વિશે વધુ માહિતી આપી નથી. અમેરિકામાં 5 નવેમ્બરે રાષ્ટ્રપતિની ચૂંટણી યોજાવાની છે (યુએસ પ્રેસિડેન્શિયલ ઇલેક્શન 2024). આવી સ્થિતિમાં ટ્રમ્પ અને પીએમ મોદી વચ્ચેની બેઠક મહત્વપૂર્ણ માનવામાં આવી રહી છે.
પીએમ મોદી ભારતીય સમુદાયને પણ સંબોધિત કરશે
વિદેશ મંત્રાલયે મંગળવારે કહ્યું કે મોદી 22 સપ્ટેમ્બરે ન્યૂયોર્કમાં ભારતીય સમુદાયના લોકોને પણ સંબોધિત કરશે. મોદી 21 સપ્ટેમ્બરના રોજ વિલ્મિંગ્ટન, ડેલવેરમાં ‘ક્વોડ લીડર્સ સમિટ’માં ભાગ લેશે, જેનું આયોજન અમેરિકી રાષ્ટ્રપતિ જો બાઈડન કરશે. ઓસ્ટ્રેલિયાના વડાપ્રધાન એન્થોની અલ્બેનીઝ અને તેમના જાપાની સમકક્ષ ફ્યુમિયો કિશિદા પણ તેમાં સામેલ થશે.
આ વર્ષે ક્વાડ સમિટની યજમાની કરવાનો ભારતનો વારો હતો. પરંતુ વોશિંગ્ટનની વિનંતીને પગલે ભારત આવતા વર્ષે સમિટની યજમાની કરવા સંમત થયું છે.
આ પણ વાંચો: જમ્મુ-કાશ્મીરમાં પ્રથમ તબક્કાનું મતદાન શરૂ, PM મોદીએ લોકોને મતદાન કરવાની કરી અપીલ
આ ઉપરાંત, ન્યુયોર્કમાં PM મોદી બંને દેશો વચ્ચે વ્યાપક સહકારને પ્રોત્સાહન આપવા માટે અગ્રણી અમેરિકન કંપનીઓના મુખ્ય કાર્યકારી અધિકારીઓ (CEO) સાથે પણ વાતચીત કરશે. આ પહેલા પીએમ મોદી અને ડોનાલ્ડ ટ્રમ્પની છેલ્લી મુલાકાત ફેબ્રુઆરી 2020માં થઈ હતી. ત્યારબાદ તત્કાલીન અમેરિકન રાષ્ટ્રપતિ ભારત આવ્યા હતા.
