વડોદરાના યુવાનની અનોખી પહેલ, વયોવૃદ્ધ મતદાતાઓને કારમાં લઈ જશે

વડોદરાઃ લોકસભાની ચૂંટણીમાં વધુમાં વધુ મતદાન થાય તે માટે શહેરના એક યુવાને વૃદ્ધ મતદારોને મતદાન મથક સુધી લઈ જવાની જવાબદારી ઉપાડી છે. શૈલેષ મહીસુરી આવા મતદારોને તેમના ઘરેથી પોતાની કારમાં મતદાન માટે મતદાન મથક સુધી લઈ જશે અને મતદાન કર્યા બાદ તેમને તેમના ઘરે પાછા મૂકશે. આ સેવા મફત હશે અને તેનો એકમાત્ર ઉદ્દેશ લોકોને મતદાન કરવા પ્રેરિત કરવાનો છે.

શૈલેષે વર્ષ-2022ની વિધાનસભાની ચૂંટણીમાં આ સેવા શરૂ કરી હતી અને પહેલાં જ વર્ષમાં 35 વૃદ્ધ મતદારોને આવી સેવા પૂરી પાડી હતી. લોકસભા ચૂંટણીમાં પણ આ સેવા ચાલુ રાખશે અને લોકોને તેમનો સંપર્ક કરવા અપીલ કરી છે.

ચૂંટણીમાં ઓછું મતદાન થવાનું કારણ જણાવતાં શૈલેષ ભાઈ કહે છે કે, ‘વયોવૃદ્ધ નાગરિકો સામાન્ય રીતે મતદાન માટે જવાનું ટાળે છે. કારણ કે તેઓ ઓટો રિક્ષાની અંદર મુસાફરી કરવામાં આરામદાયક નથી હોતા. મેં આવા વૃદ્ધ મતદારોને મારી કારમાં મતદાન મથક સુધી લઈ જવાનું નક્કી કર્યું છે. જેથી કરીને કોઈ તેમના અધિકારોથી વંચિત ન રહે અને આ ચૂંટણીમાં પણ મતદાનની ટકાવારી વધારવામાં મદદરૂપ થાય.’

શૈલેષભાઈએ વરિષ્ઠ મતદારોને મોબાઈલ નંબર 9825626207 પર સંપર્ક કરી તેમની આ સેવાનો લાભ લેવા અનુરોધ કર્યો છે. ચૂંટણી કાર્ડની મદદથી ઉંમરની ખાતરી કર્યા પછી શૈલેષ તેમનો સંપર્ક કરશે અને તેમની કારમાં મતદાન કરવા માટે મતદાન મથકે લઈ જશે. ઉલ્લેખનીય છે કે, છેલ્લા ચાર વર્ષથી તેઓ ધોરણ 10 અને ધોરણ 12ના જરૂરિયાતમંદ બોર્ડના વિદ્યાર્થીઓને મફત પરિવહન સેવા આપી રહ્યા છે અને તેઓ પરીક્ષા કેન્દ્રો પર સમયસર પહોંચે તે સુનિશ્ચિત કરે છે.

શૈલેષભાઈ ટુ વ્હીલરની ખરીદી અને વેચાણનો વ્યવસાય કરે છે અને તેમની સામાજિક જવાબદારીના ભાગરૂપે આ મફત સેવા આપી રહ્યા છે. આ ઉમદા કાર્યમાં શૈલેષભાઈને તેમની માતા અને પત્નીનો સહયોગ મળ્યો છે. તેઓ કહે છે કે, બદલામાં મને આ શ્રેય કાર્ય માટે આશીર્વાદ મળે છે.