Year Ender 2024: વર્ષભરની એવી દુર્ઘટનાઓ જેનાથી દેશ હચમચી ઉઠ્યો

Year Ender 2024: વર્ષ 2024 દેશ માટે અત્યંત પીડાદાયક અને આઘાતજનક ઘટનાઓથી ભરેલું હતું. આ વર્ષની કેટલીક ઘટનાઓ દેશભરમાં ચર્ચાનો વિષય તો બની જ નહીં, પરંતુ સરકારની સાથે-સાથે સામાન્ય જનતાને પણ આશ્ચર્યચકિત કરી દે છે. ચાલો જાણીએ આવી જ કેટલીક મોટી ઘટનાઓ વિશે, જેણે દેશભરમાં હલચલ મચાવી દીધી.

કોલકાતા બળાત્કાર કેસ: કોલકાતાની આરજી કર મેડિકલ કોલેજ અને હોસ્પિટલમાં 9 ઓગસ્ટની રાત્રે એક હૃદયદ્રાવક ઘટના બની હતી. એક મહિલા તાલીમાર્થી ડોક્ટર પર બળાત્કાર બાદ ક્રૂરતાપૂર્વક હત્યા કરવામાં આવી હતી. આ ઘટના સમગ્ર દેશમાં લોકોમાં રોષનું કારણ બની હતી. રાજ્યવ્યાપી દેખાવો થયા હતા અને સરકાર પાસે કડક કાયદો બનાવવાની માગણી કરવામાં આવી હતી. આ ઘટનાએ પશ્ચિમ બંગાળમાં કાયદો અને વ્યવસ્થા પર ગંભીર સવાલો ઉભા કર્યા છે.

વાયનાડ ભૂસ્ખલન: કેરળના વાયનાડ જિલ્લામાં 30 જુલાઈની રાત્રે એક વિશાળ ભૂસ્ખલન થયું હતું. આ ભયાનક દુર્ઘટનામાં કેટલાય કિલોમીટરનો વિસ્તાર સંપૂર્ણપણે નાશ પામ્યો હતો. આ ભૂસ્ખલનમાં 231થી વધુ લોકોનાં મોતની પુષ્ટિ થઈ હતી. અહેવાલ છે કે મૃત્યુઆંક 420થી વધુ છે. આ ઘટના બાદ અનેક વિસ્તારોમાં બચાવ કામગીરી હાથ ધરવામાં આવી હતી. અહીં વિનાશનું દ્રશ્ય હૃદયદ્રાવક હતું. આ દુર્ઘટનામાં અંદાજે 1200 કરોડ રૂપિયાનું નુકસાન થયું હોવાનું જાણવા મળ્યું છે.

કર્ણાટકમાં ગર્લફ્રેન્ડની હત્યાઃ કર્ણાટકની રાજધાની બેંગલુરુમાં મહાલક્ષ્મીની હત્યાથી સમગ્ર દેશ ખળભળાટ મચી ગયો હતો. આરોપીએ તેની ગર્લફ્રેન્ડ મહાલક્ષ્મીની હત્યા કરી, તેના શરીરના 59 ટુકડાં કરી દીધા અને રેફ્રિજરેટરમાં રાખ્યા હતા. હત્યારાએ તેની સુસાઈડ નોટમાં લખ્યું હતું કે, તેણે આ ઘાતકી ગુનો કર્યો હતો. કારણ કે, તે મહાલક્ષ્મીના વર્તનથી કંટાળી ગયો હતો અને 3 સપ્ટેમ્બરે તેની હત્યા કરી નાંખી હતી.

તિરુપતિ લાડુ વિવાદઃ તિરુપતિ મંદિરના પ્રસાદ લાડુમાં પ્રાણીઓની ચરબીનાં ઉપયોગને લઈને વિવાદ થયો હતો. આ વિવાદ 18 સપ્ટેમ્બરે શરૂ થયો હતો, જ્યારે આંધ્ર પ્રદેશના મુખ્યમંત્રી અને TDP સુપ્રીમો ચંદ્રબાબુ નાયડુએ આરોપ લગાવ્યો હતો કે, તિરુપતિ પ્રસાદમાં ચરબી ઉમેરવામાં આવી રહી છે. આ વિવાદે તિરુપતિ મંદિર પ્રશાસનને મુશ્કેલીમાં મૂક્યું હતું અને મંદિરની પ્રસાદી અંગે મોટી ચર્ચાને વેગ આપ્યો હતો.

રિયાસી આતંકવાદી હુમલોઃ 9 જૂને જમ્મુ-કાશ્મીરના રિયાસી જિલ્લાના પૌની વિસ્તારમાં આતંકવાદીઓ દ્વારા બસ પર હુમલો કરવામાં આવ્યો હતો. બસ શિવ ખોરીથી કટરા જઈ રહી હતી, ત્યારે આતંકીઓએ ગોળીબાર કર્યો હતો. હુમલા બાદ બસ ખાઈમાં પડી હતી, જેમાં એક બાળક સહિત 9 લોકોનાં મોત થયા હતા.

હાથરસમાં નાસભાગની ઘટના: ઉત્તર પ્રદેશના હાથરસમાં 2 જુલાઈના રોજ સત્સંગ પછી ફાટી નીકળેલી નાસભાગમાં 123 લોકોનાં મોત થયા હતા. ધાર્મિક સત્સંગ દરમિયાન હજારો લોકો એકઠાં થયા હતા, ત્યારે આ અકસ્માત થયો હતો. પોલીસ અને પ્રશાસનની સુરક્ષા વ્યવસ્થાના અભાવે આ અકસ્માત થયો હતો, જેમાં ભારે નાસભાગ મચી ગઈ હતી અને લોકો કચડાઈને મૃત્યુ પામ્યા હતા. આ ઘટના બાદ સત્સંગ કરી રહેલા ભોલે બાબા ઉર્ફે નારાયણ સાકર હરિ મધ્યપ્રદેશના ગ્વાલિયરમાં શિફ્ટ થઈ ગયા હતા.

ઇતિહાસનું સૌથી ગરમ વર્ષ: 2024 અત્યાર સુધીનું સૌથી ગરમ વર્ષ રહેવાની આગાહી સાચી પડી છે. આબોહવા પરિવર્તનને કારણે સમગ્ર વિશ્વમાં તાપમાનમાં રેકોર્ડ વધારો થયો છે. ભારત પણ તેમાંથી બાકાત નહોતું. જ્યાં જુલાઇ-ઓગસ્ટ મહિનામાં કાળઝાળ ગરમીએ લોકોને અસર કરી હતી.