મધના વિવિધ પ્રકાર, જાણો શરીરમાં કેવી રીતે મદદ કરે છે

અમદાવાદઃ મધમાખીનું મધમાં ઘણાં તત્વો રહેલા છે કે જે શરીરને સ્વસ્થ રાખવામાં મદદરૂપ થાય છે. મધમાખી વિવિધ પ્રકારના મધ બનાવતી હોય છે. ખાસ કરીને, મધમાખી તેના મધપૂડાથી 3 કિલોમીટરના અંતરમાં આવેલા ફૂલોમાંથી રસ ચૂંટીને મધ બનાવતી હોય છે. ત્યારે આવો જાણીએ કે વિવિધ પ્રકારના મધ કેવી રીતે સ્વાસ્થ્યમાં મદદ કરતા હોય છે.

વરિયાળીનું મધ – આ મધ પેટમાં ગેસની સમસ્યાથી લઈને કબજિયાત, અપચો, ખાટા ઓડકાર અને પેટના દુખાવાની સમસ્યામાં ખૂબ જ ફાયદાકારક છે. વરિયાળીના મધનો ઉપયોગ ત્વચા માટે પણ ખૂબ જ થાય છે. તેનાથી ત્વચા ચમકદાર અને સુંદર બને છે.

તલનું મધ – તેનાથી રોગપ્રતિકારક શક્તિ મજબૂત થાય છે. કબજિયાત મટાડે છે. ઝડપથી વજન ઉતારે છે. પેટ અને આંતરડાની સ્થિતિ સારી કરે છે. અસ્થિ મજ્જાને મજબૂત બનાવે છે. શારીરિક સહનશક્તિ વધે છે. માનસિક પ્રવૃતિને ઉત્તેજિત કરે છે અને ત્વચા ચમકદાર બનાવે છે.

અજમાનું મધ – પાચન સ્વાસ્થ્યને નિયંત્રિત કરવા અને એસિડ રિફ્લક્સ ઘટાડવા માટે ઉત્તમ છે. તે વજન ઘટાડવામાં, લોહીને સાફ કરવામાં મદદ કરે છે અને ત્વચા સારી બનાવે છે. ખાંસી અને શરદી માટે એક મહાન કુદરતી ઉપચાર છે. તે કુદરતી એન્ટિબેક્ટેરિયલ અને એન્ટીઑકિસડન્ટ એજન્ટ તરીકે પણ ફાયદાકારક છે.

રાયડાનું મધ – સ્નાયુઓમાં દુખાવો ઓછો કરે છે. ત્વચાની બીમારીઓ જેવી કે સોરાયસિસ, દાદર અને ત્વચાના સોજાથી પણ રાહત આપે છે. એન્ટીઑકિસડન્ટ અને ખનિજમાં વધારો કરે છે. રાયડાનું મધ મસ્ટર્ડના ફૂલ અને તેના પરાગમાંથી બનતું હોય છે. તેનાથી એન્ટીઑકિસડન્ટો, ખનિજ, વિટામિન્સ અને કેટલાક ટ્રેસ મિનરલ્સથી ભરપૂર છે.

ધાણાનું મધ – આ મધ આંતરડાની વિકૃતિ, કબજિયાત, કોલિક અને ગેસ્ટ્રાઇટિસ સામે પીડાતા લોકો માટે ખૂબ જ યોગ્ય છે. એટલું જ નહીં, તે રુધિરાભિસરણ તંત્રને સુધારવામાં મદદરૂપ થાય છે. આ ઉપરાંત યોગ્ય પાચન માટે પાચન સહાયક બને છે.

જંગલી વનમધ – તેના ઉત્કૃષ્ટ એન્ટિબેક્ટેરિયલ ગુણોને કારણે સારી રીતે હિલિંગ કરવામાં મદદ કરે છે. તે ઘર્ષણ, બેડસોર્સ, અલ્સર અને અન્ય ઘાના ઉપચારમાં ઝડપથી મદદ કરી શકે છે. તે એન્ટિસેપ્ટિક તરીકે પણ કામ કરે છે. ખતરનાક સુક્ષ્મસજીવોના વિકાસને અટકાવે છે અને એલર્જીથી પણ રક્ષણ આપે છે.

(નોંધઃ મધનો ઉપયોગ નિષ્ણાંતની સલાહ લઈને જ કરવો. ન્યૂઝ કેપિટલ ઉપરોક્ત જણાવેલા તમામ ઉપાયની પુષ્ટિ કરતું નથી.)