નવા આવકવેરા બિલની જરૂર કેમ પડી?, જાણો તે કરદાતાઓ પર કેવી અસર કરશે

New Income Tax Bill: નાણામંત્રી નિર્મલા સીતારમણે તેમના બજેટ ભાષણમાં નવા આવકવેરા બિલ રજૂ કરવાની ઘોષણા કરી. તે 7 ફેબ્રુઆરી, 2025ના રોજ સંસદમાં રજૂ થઈ શકે છે. સૂત્રોના જણાવ્યા અનુસાર, કેન્દ્રીય મંત્રીમંડળ શુક્રવારે નવા આવકવેરા બિલને મંજૂરી આપી શકે છે.

નાણામંત્રીએ પોતાના બજેટ ભાષણમાં કહ્યું, “છેલ્લા 10 વર્ષમાં અમારી સરકારે કરદાતાઓની સુવિધા માટે ઘણા સુધારા અમલમાં મૂક્યા છે. જેમ કે ફેસલેસ એસેસમેન્ટ, કરદાતાઓનો ચાર્ટર, ઝડપી રિટર્ન, લગભગ 99 ટકા રિટર્નનું સ્વ-મૂલ્યાંકન અને વિવાદથી વિશ્વાસ યોજના. આ પ્રયાસો ચાલુ રાખીને હું કર વિભાગની “પહેલા વિશ્વાસ કરો, પછી તપાસ કરો”ની પ્રતિબદ્ધતાને પુનઃપુષ્ટ કરું છું. હું આવતા અઠવાડિયે એક નવું આવકવેરા બિલ રજૂ કરવાનો પણ પ્રસ્તાવ મૂકું છું.”

નવા આવકવેરા બિલની જરૂર કેમ પડી?
આવકવેરા કાયદો 1961 છેલ્લા છ દાયકાથી અસ્તિત્વમાં છે અને તેમાં 298 કલમો અને 23 પ્રકરણો છે. છેલ્લા કેટલાક વર્ષોમાં વર્તમાન આવકવેરા બિલ ખૂબ જ જટિલ બન્યું છે, લગભગ દરેક કેન્દ્રીય બજેટમાં નવા સુધારાઓની જાહેરાત કરવામાં આવે છે. તેથી આવકવેરા બિલને વધુ સંક્ષિપ્ત અને સરળ બનાવવા માટે સરકાર એક નવું આવકવેરા બિલ રજૂ કરી રહી છે. એવું કહેવામાં આવી રહ્યું છે કે નવું બિલ કર પાલનને સરળ બનાવશે, વિવાદો ઘટાડશે અને કર વિશે વધુ સ્પષ્ટતા પ્રદાન કરશે.

નવા બિલમાંથી કરદાતાઓએ શું અપેક્ષા રાખવી જોઈએ?
પોતાના બજેટ ભાષણમાં, સીતારમણે કહ્યું, “મને દેશને જણાવતા આનંદ થાય છે કે નવું આવકવેરા બિલ “ન્યાય”ની ભાવનાને આગળ ધપાવશે. નવું બિલ વાંચવામાં સરળ અને સીધું હશે, જેમાં પ્રકરણો અને શબ્દો બંનેની દ્રષ્ટિએ વર્તમાન કાયદાનો લગભગ અડધો ભાગ હશે. કરદાતાઓ અને કર વહીવટ માટે તે સમજવામાં સરળ હશે, જે કર નિશ્ચિતતા પ્રદાન કરશે અને મુકદ્દમા ઘટાડશે.” નાણામંત્રીના મતે, નવું બિલ સંક્ષિપ્ત અને સરળ ભાષામાં હશે. જે કરદાતાઓ માટે તેને સમજવા અને તેનું પાલન કરવામાં સરળતા રાખશે. વધુમાં, તેનો ઉદ્દેશ્ય સુવ્યવસ્થિત કર કાયદાઓ દ્વારા કાનૂની અસ્પષ્ટતા ઘટાડવાનો છે. ઉપરાંત તેને એવી રીતે ડિઝાઇન કરવામાં આવ્યું છે કે તે આંતરરાષ્ટ્રીય ધોરણોને અનુરૂપ હોય.