બંગાળની ખાડીમાં ખતરો, દરિયાકાંઠાના વિસ્તારમાં અતિભારે વરસાદની આગાહી

ચેન્નાઈઃ બંગાળની ખાડીમાં ફરી એકવાર ઉથલપાથલ વધી છે. હિંદ મહાસાગરમાં સ્થિતિ બગડવાના કારણે દરિયાકાંઠાના વિસ્તારોના હવામાનમાં મોટા ફેરફારની સંભાવના છે. તેના નવીનતમ અપડેટમાં ભારતીય હવામાન વિભાગે (IMD) તમિલનાડુ, કર્ણાટક અને કેરળમાં ભારેથી અતિભારે વરસાદની આગાહી કરી છે. ખાસ કરીને તમિલનાડુની રાજધાની ચેન્નઈ અને તેની આસપાસના વિસ્તારો સૌથી વધુ પ્રભાવિત થવાની આશંકા છે. તેને ધ્યાનમાં રાખીને રાજ્ય સરકારે અત્યારથી જ તૈયારીઓ તેજ કરી દીધી છે. દૂધ, પીવાનું પાણી અને અન્ય જરૂરી વસ્તુઓનો સ્ટોક તૈયાર કરવામાં આવી રહ્યો છે. આ ઉપરાંત નીચાણવાળા વિસ્તારોમાં રહેતા લોકોને પણ એલર્ટ કરવામાં આવ્યા છે. રાજ્ય સરકારે કહ્યું કે અત્યાર સુધીમાં 65 હજાર સ્વયંસેવકોએ નોંધણી કરાવી છે. આ સાથે જરૂર પડશે તો NDRFની પણ મદદ લેવામાં આવશે.

હવામાન વિભાગના લેટેસ્ટ અપડેટ મુજબ આગામી 5થી 6 દિવસ સુધી તમિલનાડુ, કર્ણાટક, કેરળ જેવા રાજ્યોમાં મુશળધાર વરસાદની સંભાવના છે. સતત વરસાદને કારણે સામાન્ય જનજીવન પ્રભાવિત થવાની ખાતરી છે. IMD અનુસાર હિંદ મહાસાગર સાથે જોડાયેલા બંગાળની ખાડીના દક્ષિણ-પૂર્વ ભાગમાં સાયક્લોનિક સર્ક્યુલેશન સક્રિય છે. તેની અસરને કારણે 14 ઓક્ટોબર સુધીમાં બંગાળની ખાડીમાં નીચા દબાણનું ક્ષેત્ર વિકસિત થશે. જેના કારણે દરિયાકાંઠાના વિસ્તારોમાં મુશળધાર વરસાદની સંભાવના છે. ખાસ કરીને તમિલનાડુને સૌથી વધુ અસર થવાની સંભાવના છે. હવામાન વિભાગના અપડેટ બાદ સરકારથી લઈને પ્રશાસન સુધી તમામ સક્રિય થઈ ગયા છે.

હવામાન વિભાગના એલર્ટ બાદ તમિલનાડુ સરકાર સક્રિય થઈ ગઈ છે. મંત્રી કેએસએસઆર રામચંદ્રને કહ્યું કે, આગામી સપ્તાહે અપેક્ષિત મુશળધાર વરસાદને પહોંચી વળવા માટે તમામ જરૂરી પગલાં લેવામાં આવી રહ્યા છે. તેમણે શનિવારે જણાવ્યું કે રેવન્યુ અને ડિઝાસ્ટર મેનેજમેન્ટે કહ્યું છે કે, જે વિસ્તારોમાં 10થી 20 સેમી વચ્ચે વરસાદ પડશે ત્યાં રાહત કાર્ય હાથ ધરવામાં આવશે.

મંત્રી રામચંદ્રને કહ્યું કે 15, 16, 17 અને 18 ઓક્ટોબરે ભારે વરસાદની આગાહી છે. ચેન્નાઈ અને આસપાસના વિસ્તારોમાં તેની વ્યાપક અસર થવાની ધારણા છે. આવી સ્થિતિમાં મુખ્યમંત્રી એમકે સ્ટાલિનના નિર્દેશ પર અધિકારીઓ ચોવીસ કલાક સ્થિતિ પર નજર રાખી રહ્યા છે. તેમણે કહ્યું કે લોકોને મુશ્કેલીનો સામનો ન કરવો પડે તે માટે દૂધ, પીવાના પાણી અને અન્ય જરૂરી વસ્તુઓનો સ્ટોક તૈયાર કરવામાં આવી રહ્યો છે.

65000 સ્વયંસેવકો તૈયાર
તમિલનાડુના મંત્રી રામચંદ્રને કહ્યું કે, લગભગ 65 હજાર સ્વયંસેવકોએ રજિસ્ટ્રેશન કરાવ્યું છે. જરૂર પડશે તો તેમની મદદ લેવામાં આવશે. તેમણે એમ પણ કહ્યું કે હવામાનની પેટર્ન વિશે સતત અપડેટ લોકોને મોબાઈલ એપ દ્વારા મોકલવામાં આવશે. જરૂર પડશે તો NDRFની પણ મદદ લેવામાં આવશે. શનિવારે કરાઈકુડી, તિરુચિરાપલ્લી, નેયુર, ઈરોડ અને વર્તુપલ્લમમાં મુશળધાર વરસાદ પડ્યો હતો.