‘આતંકવાદ સામે અમે ભારત સાથે ઉભા છીએ’, US સ્ટેટ ડિપાર્ટમેન્ટનું મોટું નિવેદન
US: અમેરિકાના વિદેશ વિભાગે એક નિવેદન જારી કરીને કહ્યું છે કે આતંકવાદ સામેની લડાઈમાં અમેરિકા ભારતની સાથે ઉભું છે. તેમણે એમ પણ કહ્યું કે અમે PM મોદીને સંપૂર્ણ સમર્થન આપીએ છીએ. પહલગામ હુમલા બાદ US સ્ટેટ ડિપાર્ટમેન્ટનું આ નિવેદન આવ્યું છે. અમેરિકાના વિદેશ મંત્રી માર્કો રુબિયોએ ભારત અને અમેરિકાને સાથે મળીને કામ કરવા અને પ્રાદેશિક શાંતિ અને સ્થિરતા જાળવવાનો પ્રયાસ કરવા અપીલ કરી છે.
માર્કો રુબિયોએ જયશંકર સાથે ફોન પર વાત કરી
US સ્ટેટ ડિપાર્ટમેન્ટના પ્રવક્તા ટેમી બ્રુસે ગુરુવારે એક પ્રેસ કોન્ફરન્સમાં જણાવ્યું હતું કે, અમેરિકા ભારત અને પાકિસ્તાન વચ્ચેના તણાવ પર નજીકથી નજર રાખી રહ્યું છે. ઉલ્લેખનીય છે કે 22 એપ્રિલે જમ્મુ-કાશ્મીરના પહલગામમાં આતંકવાદીઓએ 26 નિર્દોષ પ્રવાસીઓની ગોળી મારીને હત્યા કરી હતી. આ ઘટના બાદથી ભારત અને પાકિસ્તાન વચ્ચે તણાવ ચરમસીમાએ છે. ભારતે આ ઘટના માટે પાકિસ્તાનને દોષી ઠેરવ્યું છે અને પાકિસ્તાન સાથે સિંધુ જળ સંધિ સ્થગિત કરવાની જાહેરાત કરી છે. અમેરિકાના વિદેશ મંત્રી માર્કો રુબિયોએ બુધવારે ભારતના વિદેશ મંત્રી એસ જયશંકર અને પાકિસ્તાનના વડાપ્રધાન શાહબાઝ શરીફ સાથે ફોન પર વાત કરી હતી.
PM મોદીને અમારું સંપૂર્ણ સમર્થન
બ્રુસે કહ્યું કે ‘જેમ કે રાષ્ટ્રપતિએ ગયા અઠવાડિયે PM મોદી સાથેની તેમની વાતચીતમાં પોતાનો ટેકો વ્યક્ત કર્યો હતો. ‘આતંકવાદ સામેની લડાઈમાં અમેરિકા ભારતની સાથે ઉભું છે અને PM મોદીને અમારું સંપૂર્ણ સમર્થન છે. બ્રુસે કહ્યું, ‘અમારી સરકાર ભારત અને પાકિસ્તાન સાથે સતત વાતચીત કરી રહી છે.’ અમે બંને દેશોને જવાબદારીપૂર્વક વર્તવાની અપીલ કરી છે. ભારતીય વિદેશ મંત્રી એસ જયશંકર સાથેની વાતચીતમાં માર્કો રુબિયોએ પહલગામ હુમલા પર દુઃખ વ્યક્ત કર્યું. તેમણે એ પણ પુષ્ટિ આપી કે આતંકવાદ સામેની લડાઈમાં અમેરિકા ભારતની સાથે ઉભું છે.
