વેવાણ સાથે પ્રેમસબંધમાં વેવાઈની હત્યા કેસમાં 3 આરોપીની ધરપકડ
મિહિર સોની, અમદાવાદ: વેવાણ સાથે પ્રેમસબંધમાં વેવાઈની હત્યા કેસમાં વિરમગામ પોલીસે ત્રણ આરોપી ધરપકડ કરી છે. વેવાણના પતિએ બદલો લેવા માટે વેવાઈની હત્યાનો પ્લાન ઘડ્યો હતો. શિક્ષક વેવાઈએ વેવાણ સાથે મૈત્રી કરાર કરી સાથે રહેતો હોવાની અદાવતમાં હત્યા કરી હોવાનું કબૂલાત કરી છે.
વીરમગામ પોલીસની ગીરફતમાં રહેલ કલા ગોહિલ, અજીત ગોહિલ અને જેસંગ ઉર્ફે ગોકા કટારીયાએ ભેગા મળી શિક્ષકની ક્રૂરતાથી હત્યા કરી હતી. શિક્ષકને વેવાણ સાથે પ્રેમ થઇ જતા વેવાણ સાથે મૈત્રી કરાર રહેતા હતા. બસ આજ વાતની અદાવત રાખીને બદલો લેવા માટે વેવાણ હર્ષાબેનના પતિ કલા ગોહિલે હત્યા કરવાનું કાવતરું ઘડ્યું અને 26 જાન્યુઆરીની રાત્રે માંડલ નજીક શિક્ષક નરેશ ચાવડા બેઠો હતો અને ત્યાં હથિયારો સાથે કારમાં આવેલા ત્રણ શખ્સોએ ઉપરા છાપરી હુમલો કરી લોહી લુહાણ કરી ફરાર થઈ ગયા હતા. આ સમગ્ર ઘટના CCTV કેમેરામાં કેદ થઈ હતી. હત્યા કરી વિરમગામથી ફરાર થઈ ગયા હતા. વિરમગામ ટાઉન પોલીસે ગુનો નોંધી ત્રણેયની અમદાવાદ નજીકથી ધરપકડ કરી છે.
પકડાયેલ આરોપી હત્યા કરીને શંખેશ્વર દસાડા તરફ ભાગી ગયા હતા. ત્યાંથી પરત વિરમગામ ભોજવા બ્રિજથી અમદાવાદ તરફ આવતા જ પોલીસને બાતમી મળતા ત્રણેયની ધરપકડ કરી છે. પોલીસ તપાસમાં સામે આવ્યું કે મૃતક નરેશ ચાવડા પોતાની દીકરીની સાસુ સાથે પ્રેમ સંબંધમાં હતો. દોઢ વર્ષ પહેલાં મૃતક નરેશ ચાવડાની દીકરીની સગાઈ થઈ હતી. જેથી બંન્ને પરિચયમાં આવ્યા હતા અને એકબીજા સાથે પ્રેમ સંબંધ બધાંયો હતો. પ્રેમ માટે મૃતકે સમાજના બંધન તોડીને એકસાથે જીવવા મૈત્રી કરાર કર્યો હતો. 8 મહિના પહેલા વેવાણને ઘરેથી ભગાડીને વિરમગામ ખાતે ભાડેથી રહેતા હતા અને ખાનગી સ્કૂલમાં શિક્ષક તરીકે ફરજ બજાવતા હતા. તેઓ સુખીથી જિંદગી જીવી રહ્યા હતા.
જેની માહિતી વેવાણના પતિ કલાભાઈ ગોહિલને મળી હતી. જેથી મિત્ર જેસંગભાઈ કટારીયા અને સંબંધી અજિત ગોહિલ સાથે મળીને વિરમગામના માંડલ પહોંચી નરેશ ચાવડા પર હુમલો કર્યો હતો. આરોપી કલા ગોહિલ, જેસંગ અને અજિતભાઈ પાટણના શંખેશ્વરના રહેવાસી છે. જ્યારે મૃતક નરેશ ચાવડા સુરેન્દ્રનગરના રહેવાસી છે. નોંધનીય છે કે આ અનૈતિક સબંધના કારણે મૃતકની દીકરી અને જમાઈની સગાઈ તૂટી ગઈ છે.
પ્રેમ સંબંધના હત્યા કેસમાં આરોપી કલા ગોહિલ બદલો લેવા હત્યા કરી હોવાની કબૂલાત કરી છે. ત્યારે આરોપી કલાભાઈ પેટ્રોલ પંપના માલિક છે અને તેનો ભાગીદાર અજીત ગોહિલ છે. સાથે જ કલા ગોહિલનો ડ્રાઇવર જેસંગ ઉર્ફે ગોકા કટારીયા છે. પોલીસે ત્રણેય હત્યા કરવા આવેલ સ્વિફ કાર સાથે હથિયાર કબજે કરી વધુ તપાસ શરૂ કરી છે કે હત્યા કરવા પાછળ અન્ય કોઈ કારણ છે કે કેમ તે દિશામાં તપાસ હાથ ધરી છે.
