PM Modiની ગિફ્ટ થશે તમારી, 600થી વધુ ભેટોનું ઇ-ઓક્શન શરૂ

PM Modi Gifts Auction: વડાપ્રધાન નરેન્દ્ર મોદીને મળેલી ભેટ અને સ્મૃતિ ચિહ્નોનું ઈ-ઓક્શન મંગળવારથી શરૂ થઈ ગયું છે. 2 ઓક્ટોબર સુધી આ ઓક્શન ચાલુ રહેશે. કેન્દ્રીય સંસ્કૃતિ મંત્રાલય દ્વારા 600 થી વધુ ભેટો અને સ્મૃતિ ચિહ્નોની ઓનલાઈન હરાજી કરવામાં આવી રહી છે. કેન્દ્રીય સંસ્કૃતિ મંત્રી ગજેન્દ્ર સિંહ શેખાવતે સોમવારે મીડિયાને જણાવ્યું હતું કે, આ અસાધારણ સંગ્રહ દેશની સંસ્કૃતિ, આધ્યાત્મિકતા, ઈતિહાસ અને રાજનીતિની સમૃદ્ધિ દર્શાવે છે.

ક્યાં કરાય છે રજીસ્ટ્રેશન?
ઈ-ઓક્શનમાં ભાગ લેવા માટે રસ ધરાવતા લોકો સત્તાવાર વેબસાઈટ – https://pmmementos.gov.in ના માધ્યમથી રજીસ્ટ્રેશન કરાવી શકે છે. હરાજીનો એક માર્મિક હિસ્સો ભારતના બહાદુર યોદ્ધાઓ અને સ્વતંત્રતા સેનાનીઓને સમર્પિત છે, જે દેશના ઇતિહાસના ગૌરવશાળી અધ્યાયોની સાક્ષી પૂરે છે. હરાજીની મુખ્ય વિશેષતા પેરાલિમ્પિક ગેમ્સ 2024ના સ્પોર્ટ્સ સ્મૃતિ ચિહ્નો પણ છે.

ઇ-ઓક્શનની આ છઠ્ઠી સિઝન
વડાપ્રધાન નરેન્દ્ર મોદીના સ્મૃતિ ચિહ્નોની સફળ હરાજીની શ્રેણીની આ છઠ્ઠી સિઝન છે. પ્રથમ આવૃત્તિ જાન્યુઆરી 2019માં લોન્ચ કરવામાં આવી હતી. 5 આવૃત્તિઓમાં અત્યાર સુધીમાં રૂ. 50 કરોડથી વધુની રકમ એકત્રિત કરવામાં આવી છે.

 

હરાજીમાંથી મળેલા પૈસા કોને મળશે?
કેન્દ્રીય સંસ્કૃતિ મંત્રી ગજેન્દ્ર સિંહ શેખાવતે કહ્યું કે અગાઉની આવૃત્તિઓની જેમ, આ વખતે પણ હરાજીમાંથી મળેલી રકમ નમામી ગંગે પ્રોજેક્ટમાં આપવામાં આવશે, જે ગંગા નદીના સંરક્ષણ અને પુનઃજીવિતકરણ અને તેની નાજુક ઇકોસિસ્ટમના રક્ષણ માટે કેન્દ્ર સરકારની મુખ્ય પહેલ છે.

જાણો હરાજી માટે કઈ-કઈ વસ્તુઓ મૂકવામાં આવી?
હરાજી માટે ઓફર કરવામાં આવેલી વસ્તુઓમાં પરંપરાગત કલાની શ્રેણી, જીવંત ચિત્રો, જટિલ શિલ્પો, સ્વદેશી હસ્તકલા અને આકર્ષક લોક અને આદિવાસી કલાકૃતિઓનો સમાવેશ થાય છે. આ ખજાનામાં પરંપરાગત રીતે સન્માન અને આદરના પ્રતીક તરીકે આપવામાં આવતી ઘણી વસ્તુઓનો સમાવેશ થાય છે, જેમાં પરંપરાગત ઝભ્ભો, શાલ, હેડગોર અને ઔપચારિક તલવારોનો સમાવેશ થાય છે.