ધમકીભર્યા મેઇલ બાદ શિરડી સાંઈ બાબા મંદિરમાં સુરક્ષા વધારાઈ
Maharashtra: મહારાષ્ટ્રના શિરડીમાં સ્થિત સાંઈ બાબા મંદિરને એક ઈમેલ દ્વારા બોમ્બ વિસ્ફોટની ધમકી આપવામાં આવી હતી. જે બાદ સાંઈ ભક્તોની સુરક્ષા સુનિશ્ચિત કરવામાં આવી રહી છે. દર્શન માટે કતારના પ્રવેશદ્વાર પર તપાસ કરવામાં આવી રહી છે. પ્રારંભિક માહિતીમાં જાણવા મળ્યું છે કે શિરડી સાંઈ મંદિરને પાઇપ બોમ્બથી ઉડાવી દેવાની ધમકીભરી ઈમેલ અજિત જોકામુલ્લા નામના ઈમેલ આઈડી પરથી આવી છે. આ ઇમેઇલને ધ્યાનમાં રાખીને સાંઈ બાબા સંસ્થા સતર્ક થઈ ગઈ છે. આજે રવિવાર છે, રજાનો દિવસ છે, તેથી શિરડીમાં સાંઈ ભક્તોની ભારે ભીડ છે. શિરડી દર્શન માટે આવતા ભક્તોને ચેકિંગ પછી જ પ્રવેશ આપવામાં આવી રહ્યો છે. દર્શન કતારના પ્રવેશદ્વાર પર સાંઈ બાબા સંસ્થાનના સુરક્ષા કર્મચારીઓ દ્વારા પુરુષો અને સ્ત્રીઓ બંનેનું કડક ચેકિંગ કરવામાં આવી રહ્યું છે.
મંદિર પરિસરમાં કોઈ શંકાસ્પદ વસ્તુ ન લાવવામાં આવે તેની કાળજી લેવામાં આવી રહી છે અને સાંઈ મંદિર વિસ્તારમાં પોલીસ દળ પણ પેટ્રોલિંગ કરી રહ્યું છે. એક અધિકારીએ જણાવ્યું હતું કે અહિલ્યાનગર જિલ્લામાં સ્થિત આ પ્રખ્યાત મંદિરમાં સુરક્ષા વધારી દેવામાં આવી છે, જ્યાં દર વર્ષે લાખો શ્રદ્ધાળુઓ દર્શન માટે આવે છે.
આ પણ વાંચો: સરદારધામના પ્રમુખ ગગજી સુતરિયાનું નિવેદન, ‘દિકરીઓએ કમરમાં રિવોલ્વર રાખી ફરવું જોઈએ’
શુક્રવારે મંદિર ટ્રસ્ટને એક ઈમેલ મળ્યો જેમાં મોકલનાર વ્યક્તિએ કહ્યું કે તે મંદિર પર બોમ્બ ફેંકવા જઈ રહ્યો છે. આ પછી પોલીસને માહિતી આપવામાં આવી. શ્રી શિરડી સાંઈ બાબા સંસ્થાનના મુખ્ય કાર્યકારી અધિકારી (CEO) ગોરક્ષ ગાદિલકરે જણાવ્યું હતું કે, “સંસ્થા (ટ્રસ્ટ) પાસે પોતાનો સુરક્ષા સ્ટાફ છે. ઈમેલ મળ્યા પછી અમારા સ્ટાફે ઘણી પોલીસ ટીમો સાથે મળીને તપાસ હાથ ધરી હતી, પરંતુ કંઈ શંકાસ્પદ મળ્યું ન હતું.
