લાલુએ નીતિશને પરત ફરવાની કરી ઓફર, જાણો, બિહારના CM નીતિશે શું કહ્યું?

Lalu Prasad Yadav: બિહારની રાજનીતિમાં ફરી એકવાર અટકળોનો દોર શરૂ થયો છે. બિહારના પૂર્વ મુખ્યમંત્રી અને આરજેડી પ્રમુખ લાલુ પ્રસાદ યાદવે સીએમ નીતિશને ફરી સાથે આવવાની ઓફર કરી છે. લાલુની આ ઓફરથી બિહારના રાજકારણમાં ખળભળાટ મચી ગયો છે અને સવાલ એ ઊભો થયો છે કે શું નીતીશ કુમાર ફરી એકવાર પોતાનો પક્ષ બદલી શકશે? જો કે તમામ અટકળો વચ્ચે બિહારના મુખ્યમંત્રી નીતિશ કુમારે પણ લાલુની ઓફર પર પોતાની પ્રતિક્રિયા આપી છે.

લાલુ યાદવે શું કહ્યું?
હકીકતમાં, આરજેડી સુપ્રીમો લાલુ પ્રસાદ યાદવે બિહારના મુખ્યમંત્રી નીતિશ કુમારને મહાગઠબંધનમાં પાછા આવવાની ઓફર કરી છે. નવા વર્ષના અવસર પર લાલુ યાદવે કહ્યું છે કે મુખ્યમંત્રી નીતિશ કુમાર માટે તેમના દરવાજા ખુલ્લા છે, અને જો તેઓ ઇચ્છે તો સાથે આવી શકે છે. લાલુ યાદવે એમ પણ કહ્યું છે કે નીતીશ કુમાર ભાગી ગયા તો પણ અમે તેમને માફ કરી દીધા છે.

ઓફર પર નીતિશે શું કહ્યું?
બિહારના મુખ્યમંત્રી નીતિશ કુમારે લાલુ યાદવની ઓફર ફગાવી દીધી છે. લાલુના નિવેદન પર નીતિશ કુમારે કહ્યું- તમે શું કહી રહ્યા છો… છોડો. જેડીયુના અગ્રણી નેતા વિજય ચૌધરીએ પણ લાલુ યાદવની ઓફર પર વળતો પ્રહાર કર્યો છે. વિજય ચૌધરીએ સ્પષ્ટ કહ્યું છે કે અમારી પાર્ટીમાં કોઈ ભ્રમણા નથી, પાર્ટી અને સીએમ બંનેનું સ્ટેન્ડ સ્પષ્ટ છે કે અમે એનડીએમાં છીએ અને એનડીએમાં જ રહીશું. આ મામલે બિહારના ડેપ્યુટી સીએમ સમ્રાટ ચૌધરીએ કહ્યું કે નીતીશ કુમાર લાલુ પ્રસાદ યાદવને અંદરથી જાણે છે. લાલુ પ્રસાદ યાદવ માત્ર ડરી ગયા છે.

તેજસ્વી યાદવે શું કહ્યું?
બિહારના પૂર્વ ડેપ્યુટી સીએમ અને આરજેડી નેતા તેજસ્વી યાદવે પણ આ સમગ્ર મામલે નિવેદન આપ્યું છે. સીએમ નીતિશ કુમાર માટે ગઠબંધનના દરવાજા હંમેશા ખુલ્લા છે તેવા લાલુ પ્રસાદ યાદવના નિવેદન પર તેજસ્વીએ કહ્યું- ” તમે તેને પૂછતા રહો, તે બીજું શું કહેશે? તેણે તમને બધાને શાંત કરવા માટે આ કહ્યું છે.” તેજસ્વીએ એમ પણ કહ્યું છે કે 2025 નીતીશ કુમાર માટે અલવિદા વર્ષ સાબિત થશે અને નવા વર્ષમાં બિહારમાં નવી સરકાર બનશે.