રાજકોટ SOGની મોટી કાર્યવાહી, ગેરકાયદેસર ગર્ભ પરીક્ષણ કરતી મહિલાને ઝડપી પાડી

ઋષિ દવે, રાજકોટઃ સ્પેશિયલ ઓપરેશન ગ્રુપ દ્વારા રાજકોટ શહેરના તાલુકા પોલીસ સ્ટેશન વિસ્તારમાં સ્પીડવેલ પાર્ટી પ્લોટ પાસે આવેલા સીતાજી ટાઉનશિપમાં ક્વાર્ટર નંબર C-404માં થતા ગેરકાયદે ગર્ભ પરીક્ષણના કારસ્તાનને ઝડપી પાડ્યું હોવાનું સામે આવ્યું છે. આ સમગ્ર મામલે 40 વર્ષીય સરોજ ડોડીયા નામની મહિલાને ઝડપી પાડવામાં આવી છે. તેમજ તેના વિરુદ્ધ તાલુકા પોલીસ સ્ટેશનમાં રાજકોટ મહાનગરપાલિકાના આરોગ્ય અધિકારી ડોક્ટર મૌલિક ઠાકર દ્વારા PC & PNPT એક્ટની જુદી જુદી કલમ અંતર્ગત ગુનો પણ નોંધાવવામાં આવ્યો છે.

પોલીસની તપાસમાં સરોજ ડોડીયા દ્વારા ગર્ભ પરીક્ષણ માટે એક મહિલા દલાલને રાખવામાં આવી હતી. આ મહિલા દલાલ સરોજ પાસે ગ્રાહકો લઈ આવતી હતી. જે પેટે તેને કમિશન પણ આપવામાં આવતું હતું. તેમજ ગર્ભ પરીક્ષણ કરવા માટે તેણે સીતાજી ટાઉનશિપમાં ક્વાર્ટર પણ ખરીદ્યું હતું. આ ક્વાર્ટર તેણે મદ્રાસી પરિવારને ભાડે આપ્યું હતું. તેમજ જ્યારે કોઈ સગર્ભા ગ્રાહક આવે ત્યારે પરિવાર એક રૂમ ખાલી કરી આપતો હતો.

પોલીસ દ્વારા જણાવવામાં આવ્યું હતું કે, સ્પેશિયલ ઓપરેશન ગ્રુપની ટીમને ચોક્કસ રાહેથી બાતમી મળી હતી કે, રાજકોટના સહકાર મેઇન રોડ પર રઘુવીર સોસાયટીમાં રહેતી સરોજબેન નામની મહિલા હોમકેર નર્સિંગની સારવાર સાથે સંકળાયેલી છે. તે ગેર કાયદેસર ગર્ભપરીક્ષણ ઘરે તેમજ ક્લાયન્ટના ઘરે જઈ કરી આપે છે. આ બાબતે મહિલા કોન્સ્ટેબલ ડમી ગ્રાહક બન્યા હતાં. તેમજ ત્યારબાદ રાજકોટ મનપાના આરોગ્ય અધિકારીને સાથે રાખી ટ્રેપ ગોઠવતા સરોજબેન ગેરકાયદેસર ગર્ભ પરીક્ષણ કરતા ઝડપાઈ ગયા હતા. જેથી તેમના વિરુદ્ધ તાલુકા પોલીસ સ્ટેશનમાં ગુનો દાખલ કરાવવામાં આવ્યો છે. આ સાથે 4,00,000ની કિંમતનું સોનોગ્રાફીના મશીન સહિતની વસ્તુઓ કબજે કરવામાં આવી છે.

પોલીસની પ્રાથમિક તપાસમાં સરોજ ધોરણ 12 પાસ અને નર્સિંગનો કોર્સ કરેલો હોવાનું સામે આવ્યું છે. તેમજ 10 વર્ષ કરતાં પણ વધુ નર્સિંગના વ્યવસાય સાથે સંકળાયેલી હોવાનું સામે આવ્યું છે. તેમજ ગેરકાયદેસર ગર્ભ પરીક્ષણ માટે 20,000 રૂપિયા જેટલી માતબર રકમ લેતી હોવાનું સામે આવ્યું છે. ત્યારે ડોકટર દ્વારા ઉપયોગમાં લેવામાં આવનારું ગર્ભ પરીક્ષણનું મશીન એક નર્સિંગ હોમ કેરના વ્યવસાય સાથે સંકળાયેલ મહિલા પાસે કેવી રીતે આવ્યું તે બાબતે પોલીસ દ્વારા હાલ તપાસ કરવામાં આવી રહી છે. પોલીસને શંકા છે કે સમગ્ર ઘટનામાં કોઈ ગાયનેકોલોજિસ્ટનો રોલ પણ આગામી દિવસમાં સામે આવી શકે છે.

સરોજ અગાઉ પણ ગેરકાયદેસર ગર્ભ પરીક્ષણ કરતા પોલીસના હાથે વર્ષ 2021માં ઝડપાઈ ચૂકી છે. ત્યારે તેના વિરુદ્ધ રાજકોટ ડીસીબી પોલીસ સ્ટેશન ખાતે ગુનો દાખલ કરવામાં આવ્યો હતો.