ગેહલોત-પાયલટ વચ્ચેની તિરાડને કારણે સરકાર પડી, હજુ સુધી રાહુલને નથી મળ્યો જવાબ… રાજસ્થાનમાં કોંગ્રેસનો ફેસ કોણ?

Rahul Gandhi on Ashok Gehlot Sachin Pilot: રાજસ્થાન કોંગ્રેસમાં અશોક ગેહલોત અને સચિન પાયલટ વચ્ચેનો સંઘર્ષ કોઈથી છુપાયેલો નથી. કોંગ્રેસને વર્ષોથી ચાલી આવતી આ રાજકીય દુશ્મનાવટની કિંમત અનેક વખત ચૂકવવી પડી છે. ગેહલોત અને પાયલટ વચ્ચેના આ અણબનાવને 2023ની રાજસ્થાન વિધાનસભા ચૂંટણીમાં કોંગ્રેસની દુર્દશા પાછળનું કારણ પણ માનવામાં આવતું હતું. આ કારણે કોંગ્રેસ સરકારે ત્યાં સત્તા ગુમાવી હતી. રાજ્યમાં કોંગ્રેસ હવે આગામી વિધાનસભા ચૂંટણીની તૈયારીમાં વ્યસ્ત છે અને ફરી એકવાર એ જ જૂનો પ્રશ્ન ત્યાં જોવા મળી રહ્યો છે. પ્રશ્ન એ છે કે, રાજસ્થાન કોંગ્રેસનો આગામી કેપ્ટન કોણ હશે? અશોક ગેહલોત કે સચિન પાયલટ… કે પછી કોંગ્રેસ નેતૃત્વ ત્રીજા ચહેરાની શોધમાં છે? આ વખતે આ પ્રશ્ન હવામાં નહીં, પણ ખુદ રાહુલ ગાંધીએ ઉઠાવ્યો છે, તે પણ વાઘ સફારી દરમિયાન…

જ્યારે કોંગ્રેસના નેતા રાહુલ ગાંધી રણથંભોરની બે દિવસની ખાનગી મુલાકાતે હતા. ત્યારે તેમણે વાઘ સફારી દરમિયાન સવાઈ માધોપુર કોંગ્રેસના બ્લોક પ્રમુખ છુટ્ટન લાલ મીણાને સીધો પ્રશ્ન પૂછ્યો હતો કે, ‘ગેહલોત, પાયલોટ કે બીજું કોઈ?’… ત્યારે એવું લાગ્યું કે જૂના ઘા ફરી તાજા થઈ ગયા છે. જવાબમાં છુટ્ટન લાલે સચિન પાયલટનું નામ લેતા કહ્યું, ‘પાયલટ યુવાન છે, લોકપ્રિય છે અને જનતા તેને પસંદ કરે છે. તેને કમાન સોંપવી જોઈએ.’

રાહુલ ગાંધીનું ‘સફારી રાજકારણ’
વાઘ સફારીના બહાને રાહુલ ગાંધીના આ સીધા પ્રશ્ને કોંગ્રેસના આંતરિક રાજકારણમાં હલચલ મચાવી દીધી છે. જયપુરથી દિલ્હી સુધી હવે ચર્ચા તેજ થઈ ગઈ છે કે શું કોંગ્રેસ હાઈકમાન્ડ રાજસ્થાનમાં મોટા પરિવર્તનની તૈયારી કરી રહ્યું છે? શું પાઇલટને જવાબદારી સોંપવામાં આવશે? કે પછી ગેહલોતની પકડ હજુ પણ મજબૂત છે? કે પછી પાર્ટી કોઈ નવા ચહેરાને આગળ લાવવાનો પ્રયાસ કરી રહી છે?

કોંગ્રેસના નેતાઓ પણ ગૂંચવાયા
જ્યારે જયપુરમાં કેટલાક વરિષ્ઠ નેતાઓને રાહુલ ગાંધીના પ્રશ્ન પર પ્રતિક્રિયા આપવાનું કહેવામાં આવ્યું, ત્યારે કેટલાકે ખુલ્લેઆમ પાયલટની તરફેણમાં વાત કરી હતી, જ્યારે કેટલાકે નિર્ણય હાઈકમાન્ડ પર છોડી દીધો હતો. ભૂતપૂર્વ ધારાસભ્ય પ્રશાંત બૈરવાએ પાયલટને ટેકો આપ્યો હતો અને તેમને ‘યુવાન અને લડાયક’ ગણાવ્યા હતા, જ્યારે ધારાસભ્ય રફીક ખાન અને રાજ્ય મહાસચિવ રામ સિંહ કાસવાને કહ્યું હતું કે, આ નિર્ણય પાર્ટી હાઇકમાન્ડે લેવાનો છે.

ગેહલોત vs પાયલટ – જૂની લડાઈ, નવી ચિંતા
રાજસ્થાનમાં કોંગ્રેસનું વર્તમાન માળખું ગોવિંદ દોતાસરા (જાટ ચહેરો) અને ટીકારામ જુલી (દલિત ચહેરો) ની આસપાસ ફરતો હોવા છતાં વાસ્તવિક દાવેદાર હજુ પણ ફક્ત બે જ છે… અશોક ગેહલોત અને સચિન પાયલટ.

ગેહલોતના નેતૃત્વમાં પાર્ટી વિધાનસભા ચૂંટણી હારી ગઈ, તેમ છતાં તેમના સમર્થકો હજુ પણ મજબૂત છે. બીજી બાજુ, પાયલટને જાહેર સમર્થન અને યુવાનોમાં ભારે ક્રેઝ છે. પરંતુ ગેહલોત અને પાયલટ વચ્ચે વર્ષોથી ચાલી રહેલો વિવાદ કોંગ્રેસ માટે સૌથી મોટો પડકાર બની ગયો છે. ઘણા રાજકીય નિષ્ણાતો માને છે કે, આ ઝઘડાને કારણે કોંગ્રેસ સત્તામાંથી બહાર ફેંકાઈ ગઈ હતી.

હાઈકમાન્ડની મૂંઝવણ:
રાહુલ ગાંધીના આ અનૌપચારિક પરંતુ મહત્વપૂર્ણ પ્રશ્ને સ્પષ્ટ કરી દીધું છે કે, પાર્ટી નેતૃત્વ હવે નિર્ણય લેવાના ઉંબરે છે. અમદાવાદ સંમેલનમાં પાયલટ પાસેથી પ્રસ્તાવ માંગવો, પછી ગેહલોત દ્વારા પાયલટને જાહેરમાં મળવું… આ બધા સંકેતો છે કે પાર્ટી પાયલટ પ્રત્યે નરમ વલણ વિકસાવી રહી છે.

ગેહલોત-પાયલટ વિવાદને કારણે સરકાર પડી ગઈ છે, ત્યારે પણ રાહુલ ગાંધીને જવાબ મળ્યો નથી કે, રાજસ્થાન કોંગ્રેસનો ચહેરો કોણ હશે? શું આ પાયલટ માટે સુવર્ણ તક છે, કે પછી કોંગ્રેસ ફરીથી ‘ત્રીજા’ વ્યક્તિની શોધમાં છે? એક તરફ, કોંગ્રેસના કાર્યકરો પોતે આ પ્રશ્ન પર મૂંઝવણમાં છે, જ્યારે પાર્ટી હાઇકમાન્ડ પણ પોતાના પત્તા જાહેર કરી રહ્યું નથી.