2 દિવસની સાઉદી મુલાકાતે પહોંચ્યા PM મોદી, આ મહત્વના મુદ્દાઓને મંત્રણામાં સામેલ કરવામાં આવશે
Narendra Modi Visit Jeddah: PM નરેન્દ્ર મોદી આજે સાઉદી અરેબિયાના જેદ્દાહ પહોંચ્યા હતા, જ્યાં તેમની બે દિવસીય મુલાકાત દરમિયાન ભારત અને સાઉદી અરેબિયા વચ્ચે વ્યૂહાત્મક ભાગીદારીને વધુ મજબૂત કરવા પર ભાર મૂકવામાં આવશે. સાઉદી અરેબિયાના F-15 લડાકુ વિમાનોએ વડાપ્રધાનના વિમાનને વિશેષ સન્માન તરીકે સુરક્ષા પૂરી પાડી હતી, જે બંને દેશો વચ્ચેના ઊંડા સંરક્ષણ સહયોગનું પ્રતીક છે. સાઉદી અરેબિયાને ભારતનું મૂલ્યવાન ભાગીદાર ગણાવતા વડાપ્રધાન મોદીએ આરબ ેન્યૂઝને આપેલી મુલાકાતમાં જણાવ્યું હતું કે, ‘ભારત અને સાઉદી અરેબિયા ફક્ત પોતાના માટે જ નહીં પરંતુ વિશ્વની શાંતિ, પ્રગતિ અને સમૃદ્ધિ માટે સાથે મળીને આગળ વધશે.’
મોદી સાઉદી ક્રાઉન પ્રિન્સ સાથે વિવિધ મુદ્દાઓ પર ચર્ચા કરશે
સાઉદી અરેબિયાને દરિયાઈ પડોશી, ભરોસાપાત્ર મિત્ર અને વ્યૂહાત્મક ભાગીદાર ગણાવતા વડાપ્રધાન મોદીએ બંને દેશો વચ્ચેના સંબંધોમાં અપાર સંભાવનાઓ વિશે વાત કરી હતી. તેમણે સાઉદી ‘વિઝન 2030’ અને ભારતના ‘વિકસિત ભારત 2047’ વચ્ચે સમાનતાઓ પર ભાર મૂક્યો અને કહ્યું કે બંને દેશો દ્વિપક્ષીય રોકાણ સંધિ પર કામ કરી રહ્યા છે. તેમણે ભારત અને ગલ્ફ કોઓપરેશન કાઉન્સિલ (GCC) વચ્ચે પ્રસ્તાવિત મુક્ત વેપાર કરારની પણ પ્રશંસા કરી, જે પ્રાદેશિક આર્થિક સંબંધોને એક નવું પરિમાણ આપી શકે છે. મંગળવારે સાંજે સાઉદી ક્રાઉન પ્રિન્સ મોહમ્મદ બિન સલમાન સાથેની વાતચીત સંરક્ષણ, સુરક્ષા, વેપાર અને રોકાણ જેવા ક્ષેત્રોમાં સહયોગ વધારવા પર ધ્યાન કેન્દ્રિત કરશે.
