અમેરિકા, ચીન અને ભારત નહીં… ફક્ત આ સાત દેશો જ રહેવાલાયક

Pollution: સમગ્ર વિશ્વમાં પ્રદૂષણની સમસ્યા વધુ ખરાબ બની રહી છે. તમામ પગલાં અને જાગૃતિ અભિયાનો છતાં હવાની ગુણવત્તામાં સુધારાના બહુ ઓછા સંકેતો જોવા મળે છે. અમેરિકા, ચીન અને ભારત સહિત વિશ્વના ઘણા મોટા અને પ્રભાવશાળી દેશો પ્રદૂષણના વધતા સ્તર સામે ઝઝૂમી રહ્યા છે. પરંતુ શું તમે જાણો છો કે કેટલાક દેશો એવા છે જ્યાં હવા હજુ પણ શ્વાસ લેવા યોગ્ય છે?

સ્વિટ્ઝર્લૅન્ડની હવા ગુણવત્તા દેખરેખ કંપની IQAir ના તાજેતરના અહેવાલ મુજબ, વિશ્વ આરોગ્ય સંગઠન (WHO) ના ધોરણો મુજબ વિશ્વમાં ફક્ત સાત દેશો જ એવા છે જ્યાં હવા સ્વચ્છ હોવાનું જાણવા મળ્યું છે. બીજી તરફ, ભારત સહિત ઘણા દેશોમાં વાયુ પ્રદૂષણનું સ્તર ચિંતાજનક રીતે ઊંચું છે.

ભારત વિશ્વના સૌથી પ્રદૂષિત દેશોમાંનો એક છે
IQAir ના રિપોર્ટ મુજબ, ભારત વિશ્વના ટોચના પાંચ સૌથી પ્રદૂષિત દેશોમાં સામેલ છે. દેશમાં PM2.5 કણોનું સરેરાશ પ્રમાણ પ્રતિ ઘન મીટર 50.6 માઇક્રોગ્રામ નોંધાયું હતું, જે WHO ની સલામત મર્યાદા (5 માઇક્રોગ્રામ) કરતા દસ ગણું વધારે છે. આ ડેટા દર્શાવે છે કે ભારતમાં પ્રદૂષણની સ્થિતિ ખૂબ જ ગંભીર છે અને તેની સ્વાસ્થ્ય પર પ્રતિકૂળ અસર થઈ રહી છે.

આ સાત દેશો છે જ્યાં હવા હજુ પણ સ્વચ્છ છે
ઓસ્ટ્રેલિયા, ન્યુઝીલેન્ડ, બહામાસ, બાર્બાડોસ, ગ્રેનાડા, એસ્ટોનિયા અને આઇસલેન્ડ વિશ્વના એકમાત્ર એવા દેશો છે જ્યાં હવાની ગુણવત્તા WHO દ્વારા નિર્ધારિત ધોરણોની અંદર હોવાનું જાણવા મળ્યું છે. તેનો અર્થ એ કે આ દેશોના લોકો સ્વચ્છ હવા શ્વાસ લઈ રહ્યા છે. રિપોર્ટ અનુસાર ચાડ અને બાંગ્લાદેશ વિશ્વના સૌથી પ્રદૂષિત દેશોમાં પ્રથમ અને બીજા ક્રમે છે. અહીં વાયુ પ્રદૂષણનું સ્તર WHO ની સલામત મર્યાદા કરતા 15 ગણું વધુ નોંધાયું હતું. આનાથી આ દેશોમાં સ્વાસ્થ્ય સમસ્યાઓ વધવાનું જોખમ વધુ વધ્યું છે.

આ પણ વાંચો: પ્રાંતિજમાં વ્યાજખોરોના ત્રાસથી દવા ગટગટાવીને યુવકનો આપઘાતનો પ્રયાસ, પોલીસ ફરિયાદ છતાં કાર્યવાહી ન કરવાનો આક્ષેપ

ભારતના 12 શહેરો વિશ્વના સૌથી પ્રદૂષિત શહેરોમાં સામેલ
રિપોર્ટ દર્શાવે છે કે વિશ્વના 20 સૌથી પ્રદૂષિત શહેરોમાંથી 12 એકલા ભારતમાં છે. આ યાદીમાં આસામનું બુર્નિહાટ ટોચ પર હતું, જ્યાં PM2.5 નું સ્તર 128 માઇક્રોગ્રામ પ્રતિ ઘન મીટર નોંધાયું હતું. આ ઉપરાંત દિલ્હી અને અન્ય મહાનગરોમાં પણ વાયુ પ્રદૂષણનું સ્તર સતત વધી રહ્યું છે.

વાતાવરણમાં પરિવર્તનને કારણે પ્રદૂષણ વધ્યું
નિષ્ણાતોના મતે આબોહવા પરિવર્તનને કારણે જંગલમાં આગ લાગવાની ઘટનાઓ વધી રહી છે. જેના કારણે વાયુ પ્રદૂષણ વધુ ગંભીર બની રહ્યું છે. આના કારણે દક્ષિણ એશિયા અને દક્ષિણ અમેરિકાના ઘણા ભાગો ગંભીર વાયુ સંકટનો સામનો કરી રહ્યા છે. જો સમયસર નક્કર પગલાં લેવામાં નહીં આવે તો આગામી વર્ષોમાં આ કટોકટી વધુ ઘેરી બની શકે છે.