હવે ફ્લાઈટમાં મળશે Wi-Fi, Air Indiaએ આપી નવા વર્ષની ભેટ
Air India Free Wi-Fi: નવા વર્ષ નિમિત્તે એર ઈન્ડિયાએ પોતાના મુસાફરોને મોટી ભેટ આપી છે. એર ઈન્ડિયા ડોમેસ્ટિક ફ્લાઈટ્સ પર ફ્રી વાઈ-ફાઈ ઈન્ટરનેટ શરૂ કરનાર પ્રથમ ભારતીય એરલાઈન બની છે. એર ઈન્ડિયા દ્વારા જારી કરવામાં આવેલી પ્રેસ રિલીઝમાં જણાવવામાં આવ્યું છે કે એરબસ A350, બોઇંગ 787-9 અને એરબસ A321neo એરક્રાફ્ટમાં સવાર મુસાફરો 10,000 ફૂટ ઉપર ઉડતી વખતે ઇન્ટરનેટ બ્રાઉઝ કરી શકશે. તમે સોશિયલ મીડિયા જોઈ શકશો, કામ કરી શકશો અથવા તમારા પ્રિયજનોને ટેક્સ્ટ કરી શકશો.
ડોમેસ્ટિક ફ્લાઈટમાં ફ્રી વાઈ-ફાઈ સુવિધા મળશે
આ સેવા એર ઈન્ડિયાના ન્યૂયોર્ક, લંડન, પેરિસ અને સિંગાપોરના ઈન્ટરનેશનલ રૂટ પર પહેલાથી જ આપવામાં આવી રહી છે. હવે તેને પાઇરેટ પ્રોજેક્ટ પ્રોગ્રામ હેઠળ ડોમેસ્ટિક રૂટ પર શરૂ કરવામાં આવી છે. એર ઈન્ડિયા સમયની સાથે તેના કાફલાના અન્ય એરક્રાફ્ટ પર આ સેવા શરૂ કરવાની યોજના બનાવી રહી છે. એરલાઈન્સ દ્વારા કહેવામાં આવ્યું હતું કે આઈઓએસ અથવા એન્ડ્રોઈડ ઓએસવાળા લેપટોપ, ટેબલેટ અને સ્માર્ટફોન પર વાઈ-ફાઈ સર્વિસ ફ્રીમાં ઉપલબ્ધ થશે.
એર ઈન્ડિયામાં મુસાફરો કેવી રીતે વાઈ-ફાઈનો લાભ લઈ શકશો
- તમારા ડિવાઇસ પર Wi-Fi સક્ષમ કરો અને Wi-Fi સેટિંગ્સ પર જાઓ.
- Air India Wi-Fi નેટવર્ક પર ક્લિક કરો.
- એકવાર તમે તમારા બ્રાઉઝરમાં એર ઈન્ડિયા પોર્ટલ પર જાઓ, ત્યારબાદ તમારું PNR અને છેલ્લું નામ દાખલ કરો.
- મફત ઇન્ટરનેટનો આનંદ લો.
