દ્વારકા જિલ્લામાંથી પકડાયેલ નકલી અધિકારી પાસેથી મળી અનેક ચોંકાવનારી વસ્તુઓ
દ્વારકા: દ્વારકા જિલ્લામાંથી પકડાયેલ નકલી અધિકારી પાસેથી અનેક ચોંકાવનારી વસ્તુઓ મળી આવી છે. ખંભાળિયામાં કાર પર એડિશનલ કલેક્ટર લખેલા બનાવટી બોર્ડ સાથે ઝડપાયેલા યુવક-યુવતીની આકરી પૂછતાછમાં અનેક ચોંકાવનારા ખુલાસા સામે આવ્યા છે. આરોપી જીલ પંચમતીયા પાસેથી અનેક અધિકારીઓના નામની નેમ પ્લેટો મળી હતી. તેમજ જીલ પંચમતીયા પાસેથી અનેક સરકારી સિક્કાઓ પણ મળી આવ્યા છે. એટલું જ નહીં આરોપી જીલ પંચમતિયા પાસેથી એક એરગન, એક પિસ્તોલ સહિત બે લેપટોપ અને અનેક મોબાઈલો મળ્યા હતા. આ સાથે જીલ પંચમતીયા પાસેથી અનેક દવાઓનો ગેરકાયદેસર જથ્થો મળ્યો હતો.
આરોપી જીલ પંચમતીયા પાસેથી એડમિનિસ્ટ્રેટિવ ગવર્મેન્ટ ઓફ ગુજરાત, સબ ડિવિઝનલ મેજિસ્ટ્રેટ ગવર્મેન્ટ ઓફ ઇન્ડિયા, સુપ્રિટેન્ડન્ટ ગવર્મેન્ટ ઓફ ઇન્ડિયા ઇમરજન્સી સર્વિસ, એડિશનલ કમિશનર, એડિશનલ કલેકટર, કમિશનર રેવન્યુ વિભાગ, કમિશનર મેડિકલ એજ્યુકેશન, હેડ ઓફ એન્ટોની ડિપાર્ટમેન્ટ નામની નેમ પ્લેટો મળી હતી.
આરોપી જીલ પંચમતિયાએ ખંભાળિયામાં પોતે એડિશનલ કલેક્ટરની ઓળખ આપી તેજન રામાવત નામના યુવકને પોલીસ ભરતીમાં પાસ કરાવી દેવાની લાલચ આપી તો તેમના ભાઈને મિહિરને એડી.કલેક્ટરના પી.એ. બનાવી દેવાની લાલચ આપી રૂપિયા 32,200 ખંખેરી લીધા હતા.
એમ.પી શાહ કોલેજના એડિશનલ ડીન બની રાજકોટ અભ્યાસ કરતા યુવકને MBBSમાં એડમિશન આપવાની લાલચ આપી તેમજ નાર્કોટિક્સના કેસમાંથી બહાર કઢાવી દેવાની વાત કરી 48,22,600ની છેતરપિંડી કરી હતી. આરોપીની જીલ પંચમતિયાની કિયા કારમાંથી ગાંધીનગર પાર્સિંગની નંબર GJ-18 GB-9669 પ્લેટ પણ મળી આવી હતી. આરોપીની કિયા કારમાંથી રેવન્યુ કમિશનરની નકલી નેમ પ્લેટ પણ મળી હતી. કિયા કારમાંથી સરકારી ગાડીમાં હોય તેવી લાઇટ તેમજ સાયરન પણ મળ્યા હતા. નકલી હોદ્દા ધારણ કરી ખોટા હોદ્દાનો દૂરઉપયોગ કરનારા જીલ પંચમતિયા વિરુદ્ધ નવા બે સહિત કુલ 3 ગુન્હા નોંધાયા છે. ખંભાળિયા પોલીસ દ્વારા વધુ તપાસ હાથ ધરાઈ છે.
