કેન્યામાં ભડકી હિંસા, ભારતે પોતાના નાગરિકો માટે જારી કરી એડવાઇઝરી

નવી દિલ્હી: પૂર્વ આફ્રિકન દેશ કેન્યામાં સરકારના પ્રસ્તાવિત ટેક્સ વધારાના વિરોધમાં હિંસક દેખાવો અટકવાના કોઈ સંકેત દેખાઈ રહ્યા નથી. નૈરોબીમાં ઓછામાં ઓછા પાંચ દેખાવકારોની ગોળી મારીને હત્યા કરવામાં આવી હતી અને 150 થી વધુ લોકો ઘાયલ થયા હતા. કેન્યાની સંસદમાં હજારો લોકો ઘુસી ગયા બાદ પોલીસે ટીયરગેસ અને ગોળીઓ છોડી અને તેના એક ભાગને આગ ચાંપી દીધી. કેન્યાના રાષ્ટ્રપતિ વિલિયમ રૂટોએ મંગળવારે કહ્યું કે તેઓ “હિંસા અને અરાજકતા” સામે કડક વલણ અપનાવશે. તેમની સરકારના પ્રસ્તાવિત ટેક્સ વધારા સામે વિરોધ હિંસક બની ગયો છે. ભારત સરકારે કેન્યામાં તેના નાગરિકોને અત્યંત સાવધાની રાખવા અને બિનજરૂરી હિલચાલ ન કરવાની સલાહ આપી છે.

વધુમાં કહ્યું, “કૃપા કરીને અપડેટ્સ માટે સ્થાનિક સમાચાર અને મિશનની વેબસાઇટ અને સોશિયલ મીડિયા હેન્ડલ્સને અનુસરો.”

કેન્યામાં સેના તૈનાત

કેન્યામાં પોલીસની મદદ માટે સેના તૈનાત કરવામાં આવી છે. પ્રદર્શનકારીઓ સામે ટીયર ગેસ, વોટર કેનન અને રબર બુલેટનો ઉપયોગ કરવામાં આવ્યો છે. એમનેસ્ટી કેન્યા સહિત એનજીઓએ સંયુક્ત નિવેદનમાં જણાવ્યું હતું કે, પાંચ લોકોની ગોળી મારીને હત્યા કરવામાં આવી હતી અને 31 ઘાયલ થયા હતા.

વિરોધીઓ પર રાષ્ટ્રપતિ રૂટોનું કડક વલણ
“અમે દેશદ્રોહની ઘટનાઓનો સંપૂર્ણ અસરકારક અને ઝડપથી જવાબ આપીશું,” રાષ્ટ્રપતિ રૂટોએ એક પ્રેસ કોન્ફરન્સમાં કહ્યું. એમ પણ કહ્યું કે વિરોધને “ખતરનાક લોકો દ્વારા હાઇજેક કરવામાં આવ્યો હતો”.

રુટોએ જણાવ્યું હતું કે, “તે વાજબી અથવા કલ્પનાશીલ પણ નથી કે શાંતિપૂર્ણ દેખાવકારો હોવાનો ઢોંગ કરતા ગુનેગારો લોકો તેમના ચૂંટાયેલા પ્રતિનિધિઓ અને આપણા બંધારણ હેઠળ સ્થાપિત સંસ્થાઓ સામે આતંક ફેલાવી શકે છે અને સજા નહીં મળે તેવી અપેક્ષા રાખે છે.”