કાશ્મીરમાં ચિલ્લાઇ કલાન શરૂ, તૂટ્યો ઠંડીનો 50 વર્ષનો રેકોર્ડ

Kashmir: કાશ્મીરમાં શનિવારથી ચિલ્લાઇ કલાન શરૂ થઈ ગયું છે. ચિલ્લાઇ કલાન એક ફારસી શબ્દ છે, જેનો અર્થ થાય છે ‘પુષ્કળ ઠંડી’. કાશ્મીરમાં ચિલ્લાઇ કલાન 40 દિવસ સુધી ચાલે છે. આ દરમિયાન કાશ્મીરમાં કડકડતી ઠંડી પડે છે. કાશ્મીરની રાજધાની શ્રીનગરમાં શનિવારે રાત્રે તાપમાન માઈનસ 8.5 ડિગ્રી સેલ્સિયસ નોંધાયું હતું. આ ઠંડીએ કાશ્મીરમાં છેલ્લા 50 વર્ષનો રેકોર્ડ તોડી નાખ્યો છે.

દાલ સરોવર થીજી ગયું
ભારતીય હવામાન વિભાગ (IMD) કહે છે કે રવિવારે સવારે શ્રીનગરમાં તાપમાન માઈનસ 3.2 ડિગ્રી સેલ્સિયસ નોંધાયું હતું. કાશ્મીરમાં ઠંડા પવનોને કારણે દાલ સરોવર પણ સંપૂર્ણપણે થીજી ગયું છે. 1974 પછી પહેલીવાર 21 ડિસેમ્બરે તાપમાન 8 ડિગ્રી સેલ્સિયસથી નીચે ગયું હતું. જ્યારે 13 ડિસેમ્બરે શ્રીનગરમાં સૌથી ઓછું તાપમાન માઈનસ 12.8 ડિગ્રી સેલ્સિયસ નોંધાયું હતું. જમ્મુ-કાશ્મીરમાં વધી રહેલી ઠંડીની અસર દિલ્હી સહિત આસપાસના રાજ્યો પર થવાની છે. રવિવારે સવારે દિલ્હીમાં ધુમ્મસની ચાદર છવાઈ ગઈ હતી. પાટનગરનું લઘુત્તમ તાપમાન 8 ડિગ્રી સેલ્સિયસ નોંધાયું છે. IMD એ ઘણા રાજ્યોમાં કોલ્ડ વેવની ચેતવણી જારી કરી છે.

વરસાદની શક્યતા
IMD અનુસાર, અફઘાનિસ્તાનમાં વેસ્ટર્ન ડિસ્ટર્બન્સ સક્રિય છે અને તે ઝડપથી પૂર્વ તરફ આગળ વધી રહ્યું છે. આવી સ્થિતિમાં 22 અને 23 ડિસેમ્બરે ઉત્તર ભારતના કેટલાક ભાગોમાં હળવો વરસાદ થવાની સંભાવના છે. જ્યારે 24 થી 26 ડિસેમ્બર સુધી હિમાચલ પ્રદેશ, જમ્મુ-કાશ્મીર, ઉત્તરાખંડ, પંજાબ અને હરિયાણામાં તીવ્ર ઠંડી જોવા મળી શકે છે.

જો IMDની આગાહી પર વિશ્વાસ કરવામાં આવે તો જમ્મુ કાશ્મીર, લદ્દાખ અને હિમાચલ પ્રદેશના કેટલાક વિસ્તારોમાં તાપમાન 0 ડિગ્રી સેલ્સિયસથી નીચે રહેશે. જ્યારે ગુજરાત અને મહારાષ્ટ્ર સહિત મધ્ય ભારતમાં તાપમાન 10-15 ડિગ્રી સેલ્સિયસ રહેવાની સંભાવના છે. દિલ્હી સહિત ઉત્તર ભારતના ઘણા રાજ્યોમાં તાપમાન 0-5 ડિગ્રી સેલ્સિયસની વચ્ચે રહી શકે છે.