‘મંદિરની સુરક્ષા વધારો…’, રામ મંદિર ટ્રસ્ટ અને UPના ઘણા જિલ્લાઓના DMને મળી બોમ્બથી ઉડાવી દેવાની ધમકી

Ram Mandir Bomb Threat Email: અયોધ્યામાં રામ જન્મભૂમિ ટ્રસ્ટ અને UPના અનેક જિલ્લાઓના જિલ્લા મેજિસ્ટ્રેટ (DM)ને ધમકીભર્યો મેઇલ મળ્યો છે. આ મેઇલ સોમવારે રાત્રે મોકલવામાં આવ્યો હતો, જેમાં રામ મંદિરની સુરક્ષા વધારવાની ચેતવણી આપવામાં આવી હતી. મેઇલમાં લખવામાં આવ્યું હતું કે, ‘મંદિરની સુરક્ષામાં વધારો કરો.’ જેના પરથી સ્પષ્ટ થાય છે કે કોઈ મોટા ષડયંત્રની ધમકી આપવામાં આવી છે. આ બાબતને ગંભીરતાથી લેતા, રામ મંદિર ટ્રસ્ટે અયોધ્યાના સાયબર પોલીસ સ્ટેશનમાં FIR નોંધાવી છે.

સુરક્ષા એજન્સીઓ એલર્ટ પર
આ મેઇલ પછી, અયોધ્યામાં સુરક્ષા એજન્સીઓએ એલર્ટ જારી કર્યું અને વિગતવાર સર્ચ ઓપરેશન શરૂ કર્યું. આ સાથે, બારાબંકી, ચંદૌલી જેવા અન્ય જિલ્લાઓને પણ એલર્ટ પર રાખવામાં આવ્યા હતા કારણ કે આ જિલ્લાઓના ડીએમને પણ મેઇલ દ્વારા બોમ્બ વિસ્ફોટની ધમકી આપવામાં આવી હતી.

સુરક્ષા એજન્સીઓની શરૂઆતની તપાસમાં જાણવા મળ્યું છે કે આ ધમકીભર્યા મેઇલ તમિલનાડુથી મોકલવામાં આવ્યા છે. હવે સાયબર સેલે આ મેઇલ્સની તપાસ શરૂ કરી દીધી છે, જેથી મેઇલ મોકલનારની ઓળખ કરી શકાય. હાલમાં, અયોધ્યા, બારાબંકી, ચંદૌલી અને અન્ય સંબંધિત જિલ્લાઓમાં સુરક્ષા વધારી દેવામાં આવી છે.

બોમ્બની ધમકીથી ચંદૌલી કલેક્ટરેટમાં ભયનો માહોલ
ચંદૌલી કલેક્ટર ઓફિસમાં બોમ્બ વિસ્ફોટની ધમકીભર્યો મેઇલ ચંદૌલી જિલ્લા મેજિસ્ટ્રેટના સત્તાવાર મેઇલ આઈડી પર મળ્યો હતો. આ મેઇલ તમિલનાડુના રહેવાસી ગોપાલ સ્વામી નામના વ્યક્તિ દ્વારા મોકલવામાં આવ્યો હતો. કલેક્ટર કચેરીને ઉડાવી દેવાની ધમકીભરી મેઇલ મળ્યા બાદ, તમામ સુરક્ષા એજન્સીઓ તાત્કાલિક અસરથી સક્રિય થઈ ગઈ. તરત જ પોલીસ ફોર્સ અને બોમ્બ સ્કવોડની ટીમને પણ બોલાવવામાં આવી હતી અને સમગ્ર બિલ્ડિંગની તલાશી લેવામાં આવી હતી. પરંતુ રાહતની વાત એ છે કે સર્ચ દરમિયાન કોઈ વિસ્ફોટક કે અન્ય કોઈ શંકાસ્પદ વસ્તુ મળી નથી. ત્યારે કલેકટર કચેરીના તમામ અધિકારીઓ અને કર્મચારીઓએ રાહતનો શ્વાસ લીધો હતો.

સવારે મેઇલ દ્વારા ધમકી આપવામાં આવી હતી
નિખિલ ટી. ફંડેએ કહ્યું કે સવારે ઈમેલ દ્વારા ચેતવણી આપવામાં આવી હતી કે આજે ચંદૌલી કલેક્ટર કચેરીમાં બોમ્બ બ્લાસ્ટ થઈ શકે છે. તેની પાછળ તેણે તમિલનાડુ સંબંધિત કેટલાક કારણો આપ્યા હતા. તે વ્યક્તિએ તેમને આપેલું સરનામું પણ તમિલનાડુનું હતું અને આ મુદ્દો પણ તમિલનાડુનો રાજકીય મુદ્દો હતો. પરંતુ તેમ છતાં, સાવચેતી રાખીને, અમે કેપ્ટન સાહેબની મદદથી સમગ્ર કલેક્ટર કચેરીની તપાસ કરાવી. બોમ્બ સ્ક્વોડની ટીમે પણ આવીને તપાસ કરી. તપાસ દરમિયાન કંઈ મળ્યું નહીં.