ગુજરાત રાજ્ય બીજ નિગમ લિમિટેડ દ્વારા ડિવિડન્ડનો ચેક CMને અર્પણ કરવામાં આવ્યો
ગાંધીનગરઃ મુખ્યમંત્રી ભૂપેન્દ્ર પટેલને ગુજરાત રાજ્ય બીજ નિગમ લિમિટેડ દ્વારા વર્ષ 2023-24ના વર્ષના ડિવિડન્ડનો 10.65 લાખ કરોડનો ચેક ગાંધીનગરમાં અર્પણ કરવામાં આવ્યો હતો.
મુખ્યમંત્રીને રાજ્ય સરકારના કૃષિ, ખેડૂત કલ્યાણ અને સહકાર વિભાગના ગુજરાત રાજય બીજ નિગમ લિમિટેડના ડિવિડન્ડનો આ ચેક કૃષિ મંત્રી રાઘવજીભાઈ પટેલ, કૃષિ રાજ્યમંત્રી બચુભાઈ ખાબડ, મુખ્યમંત્રીના અધિક મુખ્ય સચિવ એમકે દાસ, ગુજરાત રાજ્ય બીજ નિગમના ચેરમેન અને અધિક મુખ્ય સચિવ અંજૂ શર્મા, વહીવટી સંચાલક પીએસ રબારીની ઉપસ્થિતિમાં અર્પણ કરવામાં આવ્યો હતો.
મુખ્યમંત્રી ભૂપેન્દ્ર પટેલના દૃષ્ટિવંત નેતૃત્વમાં ગુજરાત રાજય બીજ નિગમ “ગુરાબીનિ” બ્રાન્ડથી ખેડૂતોને ઉચ્ચ ગુણવત્તાવાળું બિયારણ પુરું પાડી રહ્યું છે. ગુજરાત રાજ્ય બીજ નિગમે 2023-24ના વર્ષમાં 2.92 લાખ કિવન્ટલ બીજનું ઉત્પાદન તથા 2.62 લાખ કિવન્ટલ જેટલા બિયારણનું વિતરણ કર્યું છે.
