ગુજરાત વેરા નિરીક્ષક વર્ગ-3ની પરીક્ષાના ઉમેદવારો માટે ગુજરાત ST દ્વારા એક્સ્ટ્રા બસની સુવિધા
ગાંધીનગર: વિદ્યાર્થીઓ માટે ગુજરાત ST દ્વારા મહત્વનો નિર્ણય લેવાયો છે. ગુજરાત જાહેર સેવા આયોગ દ્વારા રાજ્ય વેરા નિરીક્ષક વર્ગ 3ની જગ્યા ઉપર ભરતી કરવા માટે પ્રિલિમરી પરીક્ષાનું આયોજન 22 ડિસેમ્બર 2024ના રોજ સવારે 11થી 1 દરમિયાન રાજ્યના 33 જિલ્લાના 754 કેન્દ્રો પર કરવામાં આવ્યુ છે.
ગુજરાત જાહેર સેવા આયોગ- GPSC દ્વારા આગામી તા. 22 ડિસેમ્બર2024 રવિવારના રોજ રાજ્ય વેરા નિરીક્ષક વર્ગ-3ની પ્રિલીમરી પરીક્ષા યોજાનાર છે. રાજ્યના તમામ 33 જિલ્લાઓના કુલ 754 પેટા કેન્દ્રો પર રવિવારે સવારે 11 થી બપોરે 01 કલાક દરમિયાન આ પરીક્ષા યોજાશે. આ પરીક્ષાર્થીઓને કેન્દ્રો પર જવા-આવવા યોગ્ય સુવિધા મળી રહે તે માટે ગુજરાત ST દ્વારા વધારાની બસો સંચાલિત કરવામાં આવશે.
રાજ્યભરમાં યોજાનાર રાજ્ય વેરા નિરીક્ષક વર્ગ-૩ની પરીક્ષામાં ઉમેદવારો-પરીક્ષાર્થીઓ સમયસર પોતાના કેન્દ્રો પર પહોંચી શકે તેવા ઉમદા હેતુથી ટ્રાફિકને ધ્યાને રાખીને ગુજરાત રાજ્ય માર્ગ વાહન વ્યવહાર નિગમ-ST દ્વારા વધારાની એક્સ્ટ્રા બસોની સુવિધા ઉપલબ્ધ કરાવાનો મહત્વનો નિર્ણય કરવામાં આવ્યો છે. પરીક્ષાના દિવસે માર્ગમાં આવતા જે તે સ્ટેન્ડ પરથી સામાન્ય મુસાફરોને બસમાં પ્રવેશ આપતી વખતે પરીક્ષાર્થીઓને અગ્રિમતા આપવા નિગમ દ્વારા તમામ ડેપોને ખાસ સૂચના આપવામાં આવી છે.
આ વિશેષ સુવિધાના પરિણામે પરીક્ષાર્થીઓ સમયસર પરીક્ષા કેન્દ્રો પર પહોંચીને પરીક્ષા આપી શકશે જેનો મહત્તમ લાભ લેવા રાજ્યભરના પરીક્ષાર્થીઓને ગુજરાત ST નિગમ દ્વારા અનુરોધ કરવામાં આવ્યો છે.
