Diwali 2024: ભારત-ચીન સરહદે જવાનો સાથે દિવાળી ઉજવશે રાજનાથ સિંહ
Diwali 2024: રક્ષા મંત્રી રાજનાથ સિંહ દિવાળીના તહેવારને લઈને અરુણાચલ પ્રદેશ જશે. તેઓ અરુણાચલ પ્રદેશના સરહદી વિસ્તાર તવાંગમાં સેનાના જવાનો સાથે દિવાળી ઉજવશે. અહીં તેઓ ભારતીય સેનાના જવાનો અને અધિકારીઓ સાથે મુલાકાત કરશે. આ દરમિયાન કેન્દ્રીય મંત્રી કિરણ રિજિજુ પણ તેમની સાથે રહેશે. રક્ષા મંત્રી રાજનાથ સિંહે તેમની મુલાકાત અંગે માહિતી આપતા કહ્યું કે તેઓ અરુણાચલ પ્રદેશની બે દિવસીય મુલાકાતે નવી દિલ્હીથી તવાંગ જઈ રહ્યા છે. સંરક્ષણ પ્રધાન અહીં સશસ્ત્ર દળોના જવાનો સાથે વિશેષ ચર્ચા કરશે અને ભારતીય સેનાના મેજર રાલેંગનાઓ બોબ ખાથિંગને સમર્પિત સંગ્રહાલયના ઉદ્ઘાટનમાં હાજરી આપશે.
‘વાયુ વીર વિજેથા’ કાર રેલીને ફ્લેગ ઓફ કરશે
બુધવારે ચીનની સરહદે આવેલા અરુણાચલ પ્રદેશમાં રક્ષામંત્રી રાજનાથ સિંહ ભારતીય વાયુસેના એસસીસીની વાયુ વીર વિજય કાર રેલીને પણ ફ્લેગ ઓફ કરશે. આ રેલી પોતાની રીતે જ એક ખૂબ જ મહત્વપૂર્ણ છે, તેનું આયોજન ભારતીય વાયુસેનાની 92મી વર્ષગાંઠ અને 1999ના કારગિલ યુદ્ધમાં ભારતની જીતના 25 વર્ષ થવા નિમિત્તે કરવામાં આવી હતી. રેલીનો ઉદ્દેશ્ય યુવાનોને સશસ્ત્ર દળોમાં સામેલ થવા માટે પ્રેરિત કરવાની સાથે યુદ્ધો અને બચાવ કામગીરીમાં ભારતીય વાયુ સેનાના ગૌરવપૂર્ણ ઇતિહાસ અને વીરતા અંગે જાગૃતિ વધારવાનો હતો.
8મી ઓક્ટોબરે લદ્દાખના થોઈસથી થઈ હતી રવાના
‘વાયુ વીર વિજેતા’ કાર રેલી 8 ઓક્ટોબરે લદ્દાખના થોઈસથી શરૂ થઈ હતી. સમુદ્ર સપાટીથી 3,068 મીટરની ઉંચાઈ પર આવેલું થોઈસ વિશ્વનું સૌથી ઊંચું એરફોર્સ સ્ટેશન છે. આ રેલીના ભાગરૂપે, વાયુસેનાના યોદ્ધાઓ, સેનાના જવાનો, પૂર્વ વાયુસેના જવાનો અને ઉત્તરાખંડ વોર મેમોરિયલ (UWM) ના સભ્યોની ટીમ હવે તવાંગ પહોંચી ગઈ છે.
