કેદારનાથ અને હેમકુંડ સાહિબ રોપ-વે પ્રોજેક્ટ્સની કેન્દ્ર સરકારે આપી મંજૂરી
Ropeway will be built for Kedarnath Dham: કેન્દ્ર સરકારે આજે કેદારનાથ અને હેમકુંડ સાહિબ રોપ-વે પ્રોજેક્ટ્સને મંજૂરી આપી. કેબિનેટે રાષ્ટ્રીય રોપ-વે વિકાસ કાર્યક્રમ હેઠળ ઉત્તરાખંડમાં સોનપ્રયાગથી કેદારનાથ (12.9 કિમી) અને ગોવિંદઘાટથી હેમકુંડ સાહિબ જી (12.4 કિમી) સુધીના રોપવે પ્રોજેક્ટ – પર્વતમાલા પ્રોજેક્ટના વિકાસને મંજૂરી આપી છે.
PM નરેન્દ્ર મોદીની અધ્યક્ષતામાં કેબિનેટ કમિટી ઓન ઈકોનોમિક અફેર્સ (CCEA) એ સોનપ્રયાગથી કેદારનાથ (12.9 કિમી) સુધીના 12.9 કિમીના રોપ-વે પ્રોજેક્ટના નિર્માણને મંજૂરી આપી છે. આ પ્રોજેક્ટ ડિઝાઇન, બિલ્ડ, ફાઇનાન્સ, ઓપરેટ અને ટ્રાન્સફર (DBFOT) મોડ પર વિકસાવવામાં આવશે અને તેનો કુલ મૂડી ખર્ચ રૂ. 4,081.28 કરોડ થશે.
તે સૌથી અદ્યતન ટ્રાઇ-કેબલ ડીટેચેબલ ગોંડોલા (3S) ટેક્નોલોજી પર આધારિત હશે. તેની ડિઝાઇન ક્ષમતા પ્રતિ કલાક પ્રતિ દિશા (PPHPD) 1,800 મુસાફરોની હશે, જે દરરોજ 18,000 મુસાફરોનું વહન કરશે. આ રોપ-વે પ્રોજેક્ટ કેદારનાથની મુલાકાત લેતા યાત્રાળુઓ માટે વરદાનરૂપ બનશે કારણ કે તે પર્યાવરણને અનુકૂળ, આરામદાયક અને ઝડપી કનેક્ટિવિટી પ્રદાન કરશે અને એક દિશામાં મુસાફરીનો સમય લગભગ 8 થી 9 કલાકથી લગભગ 36 મિનિટ સુધી ઘટાડશે.
કેદારનાથ મંદિર સુધીની યાત્રા ગૌરીકુંડથી 16 કિમીની પડકારજનક ચઢાણ છે અને હાલમાં તે પગપાળા અથવા પાલખી અને હેલિકોપ્ટર દ્વારા કરવામાં આવે છે. પ્રસ્તાવિત રોપવે મંદિરની મુલાકાત લેતા યાત્રાળુઓને સુવિધા પૂરી પાડવા અને સોનપ્રયાગ અને કેદારનાથ વચ્ચે તમામ ઋતુઓમાં કનેક્ટિવિટી સુનિશ્ચિત કરવા માટે બનાવવામાં આવ્યો છે.
કેબિનેટની બેઠકમાં ગોવિંદઘાટથી હેમકુંડ સાહિબ જી સુધીના 12.4 કિલોમીટરના રોપ-વે પ્રોજેક્ટના નિર્માણને પણ મંજૂરી આપવામાં આવી હતી. આ પ્રોજેક્ટનો કુલ ખર્ચ રૂ. 2,730.13 કરોડ થશે. હાલમાં હેમકુંડ સાહિબ જીની યાત્રા ગોવિંદઘાટથી 21 કિલોમીટરની પડકારરૂપ ચઢાણ છે. આ રોપવે પ્રોજેક્ટ ગોવિંદઘાટ અને હેમકુંડ સાહિબ જી વચ્ચે તમામ ઋતુઓમાં કનેક્ટિવિટી સુનિશ્ચિત કરશે.
તેને એવી રીતે ડિઝાઇન કરવામાં આવશે કે તેની ક્ષમતા 1,100 મુસાફરો પ્રતિ કલાક (PPHPD) હશે અને તે દરરોજ 11,000 મુસાફરોને વહન કરશે. હેમકુંડ સાહિબ જી એ ઉત્તરાખંડ રાજ્યના ચમોલી જિલ્લામાં 15,000 ફૂટની ઉંચાઈ પર સ્થિત એક તીર્થસ્થાન છે. આ પવિત્ર સ્થળ પર સ્થાપિત ગુરુદ્વારા મે થી સપ્ટેમ્બર દરમિયાન વર્ષમાં લગભગ 5 મહિના ખુલ્લું રહે છે અને દર વર્ષે લગભગ 1.5 થી 2 લાખ યાત્રાળુઓ અહીં આવે છે.
