ભારત મારું બીજું ઘર, મને અહીં રહેવા દો; તસ્લીમા નસરીનની અમિત શાહને અપીલ

Taslima Nasreen: બાંગ્લાદેશની નિર્વાસિત લેખિકા તસ્લીમા નસરીને કેન્દ્રીય ગૃહ મંત્રી અમિત શાહને ભારતમાં રહેવાની મંજૂરી આપવા માટે અપીલ કરી છે. સોશિયલ મીડિયા X પર એક પોસ્ટમાં અમિત શાહને ટેગ કરતાં નસરીને લખ્યું, “પ્રિય અમિત શાહ જી, નમસ્કાર. હું ભારતમાં રહું છું કારણ કે હું આ મહાન દેશને પ્રેમ કરું છું. છેલ્લા 20 વર્ષથી આ મારું બીજું ઘર છે પરંતુ ગૃહ મંત્રાલયે 22 જુલાઈથી મારી રહેવાની પરમીટ લંબાવી નથી. હું ખૂબ જ ચિંતિત છું. જો તમે મને રહેવા દો તો હું તમારો ખૂબ આભારી રહીશ. હાર્દિક શુભેચ્છાઓ.”

.@AmitShah Dear AmitShahji 🙏Namaskar. I live in India because I love this great country. It has been my 2nd home for the last 20yrs. But MHA has not been extending my residence permit since July22. I'm so worried.I would be so grateful to you if you let me stay. Warm regards.🙏

— taslima nasreen (@taslimanasreen) October 21, 2024

સાંપ્રદાયિકતાના કટ્ટર ટીકાકાર તસ્લીમા નસરીન 1994થી નિર્વાસિત જીવન જીવી રહી છે. તે 1990ના દાયકાથી તેની નવલકથાઓને કારણે ચર્ચામાં છે. સાંપ્રદાયિકતા અને મહિલા સમાનતા પરના તેમના લખાણો માટે તે બાંગ્લાદેશમાં ઇસ્લામિક કટ્ટરપંથીઓના નિશાના પર રહી છે. કટ્ટરપંથીઓની ટીકા અને ડરના કારણે તેણે બાંગ્લાદેશ છોડવું પડ્યું. આ પછી તે યુરોપ અને અમેરિકા ગયા. બાદમાં 2004માં તે ભારત આવી અને ત્યારથી અહીં રહે છે.

તસ્લીમાએ 1994માં પ્રકાશિત થયેલી તેમની નવલકથા ‘લજ્જા’ના કારણે સાહિત્ય જગતમાં ઘણી ચર્ચા જગાવી હતી. આ પુસ્તક 1992માં બાબરી મસ્જિદના ધ્વંસ પછી આવ્યું હતું. જેમાં બાબરી ધ્વંસ બાદ બંગાળી હિંદુઓ વિરુદ્ધ હિંસા, બળાત્કાર, લૂંટફાટ અને હત્યા વિશે લખવામાં આવ્યું હતું. તેમનું પહેલું પુસ્તક 1993માં બંગાળીમાં પ્રકાશિત થયું હતું પરંતુ બાદમાં બાંગ્લાદેશમાં તેના પર પ્રતિબંધ મૂકવામાં આવ્યો હતો. આ પછી જ તેને જાનથી મારી નાખવાની ધમકીઓ મળવા લાગી અને પછી તેણે દેશ છોડીને ભાગી જવું પડ્યું.