બાબા સિદ્દીકીના પુત્ર ઝીશાનને ફરી મળી જાનથી મારી નાખવાની ધમકી, રૂ.10 કરોડની કરી માગ

Baba Siddiqui Zeeshan: બાબા સિદ્દીકી મર્ડર કેસ હજુ સંપૂર્ણ રીતે ઉકેલાયો નથી કે હવે તેના પુત્ર ઝીશાન સિદ્દીકીને ફરી જાનથી મારી નાખવાની ધમકી મળી છે. ધમકી મોકલનારા લોકોએ ઝીશાન સિદ્દીકી પાસેથી 10 કરોડ રૂપિયાની માંગણી કરી છે. નોંધનીય છે કે, હાલમાં બાંદ્રા પોલીસની એક ટીમ ઝીશાન સિદ્દીકીના ઘરે પહોંચી છે અને તેમનું નિવેદન નોંધી રહી છે.

ધમકીમાં શું કહેવામાં આવ્યું હતું?
ઝીશાન સિદ્દીકીને અત્યાર સુધીમાં ત્રણ અલગ-અલગ મેઇલ મોકલવામાં આવ્યા છે, જેમાં મોકલનારએ ડી-કંપનીનો ઉલ્લેખ કર્યો છે. મેઇલમાં એવું પણ લખ્યું છે કે બાબા સિદ્દીકી સાથે જે થયું તે તમારી સાથે પણ થશે. આ ઉપરાંત, મેઇલમાં એવું પણ કહેવામાં આવ્યું છે કે બાબા સિદ્દીકીની હત્યામાં લોરેન્સ બિશ્નોઈનું નામ ઉમેરવામાં આવ્યું હતું, જે ખોટું છે. જો તમે પૈસા આપવા તૈયાર હોવ તો તમને સ્થળ જણાવવામાં આવશે. જોકે, મેઇલ મોકલનાર વિશે હજુ સુધી કોઈ માહિતી મળી નથી. ઝીશાન સિદ્દીકી હાલમાં બાંદ્રા પોલીસને પોતાનું નિવેદન આપી રહ્યા છે.

બાબા સિદ્દીકીની હત્યા ક્યારે થઈ હતી?
66 વર્ષીય બાબા સિદ્દીકીની 12 ઓક્ટોબર 2024ના રોજ મુંબઈના બાંદ્રા ઈસ્ટ વિસ્તારમાં હત્યા કરવામાં આવી હતી. આ હત્યાકાંડ ત્રણ હુમલાખોરો દ્વારા સિદ્દીકીના પુત્ર ઝીશાન સિદ્દીકીની ઓફિસની બહાર ગોળી મારીને કરવામાં આવ્યો હતો. બાબા સિદ્દીકી મહારાષ્ટ્રમાં એક જાણીતા વ્યક્તિત્વ હતા. તેઓ NCPના નેતા હતા અને અગાઉ મંત્રી પણ રહી ચૂક્યા છે. આ ઉપરાંત તે બોલિવૂડ અને સેલિબ્રિટી પાર્ટીઓ માટે પણ જાણીતા હતા. તેમના ઘરે મોટા કલાકારો આવતા હતા. શાહરુખ અને સલમાન સહિત અનેક સેલિબ્રિટીઝ સાથે તેમના સંબંધો હતા. બાબાની હત્યાએ દેશભરમાં હેડલાઈન્સ બનાવી હતી અને લાંબા સમય સુધી આ મુદ્દાની ચર્ચા થઈ હતી. આ હત્યા કેસમાં જેલમાં બંધ ગેંગસ્ટર લોરેન્સ બિશ્નોઈનું નામ સામે આવ્યું હતું.