જૂનાગઢ યાર્ડમાં કેસર કેરીનું આગમન, 1000થી 1500 રૂપિયા પ્રતિ બોક્સના ભાવે થઈ હરરાજી

સાગર ઠાકર, જૂનાગઢ: જૂનાગઢ યાર્ડમાં કેસર કેરીનું આગમન થઇ ચૂક્યું છે અને યાર્ડમાં કેસર કેરીની હરાજીના શ્રીગણેશ થયા હતા. યાર્ડમાં સરેરાશ 200 થી 300 બોક્સની આવક થઇ રહી છે અને 1000થી 1500 રૂપીયા પ્રતિ બોક્સના ભાવે હરાજી થઇ રહી છે. જો કે હજુ કેરીની શરૂઆત છે પરંતુ આવતાં દિવસોમાં કેરીની આવક વધતાં ભાવમાં ઘટાડો થશે. ચાલુ વર્ષે વાતાવરણની કેરીના પાકને અસર પડી છે તેથી ચાલુ વર્ષે કેરી બજારમાં 25થી 30 ટકા ઓછી આવક રહે તેવી સંભાવના છે. તેમ છતાં જે આવક થશે તે સારી રહેશે તેવી આશા સેવાઈ રહી છે.

વર્ષ 2023 દરમિયાન કેરીની આવક સરેરાશ 2000થી 5000 બોક્સ
વર્ષ 2023 દરમિયાન કેરીના ભાવ સરેરાશ 250થી 500 પ્રતિ બોક્સ

વર્ષ 2024 દરમિયાન કેરીની આવક સરેરાશ 600થી 1000 બોક્સ
વર્ષ 2024 દરમિયાન કેરીના ભાવ સરેરાશ 600થી 1800 પ્રતિ બોક્સ

વર્ષ 2025 દરમિયાન કેરીની આવક સરેરાશ 200થી 300 બોક્સ
વર્ષ 2025 દરમિયાન કેરીના ભાવ સરેરાશ 1000થી 1500 પ્રતિ બોક્સ

આમ ગત વર્ષની સરખામણીએ એપ્રિલ મહિનાની સરેરાશ આવકમાં ઘટાડો જોવા મળી રહ્યો છે સામે ભાવમાં વધારો જોવા મળી રહ્યો છે

જૂનાગઢ માર્કેટીંગ યાર્ડમાં આમ તો છેલ્લા એક અઠવાડીયાથી બે પાંચ બોક્સ કેરીની આવક થઈ હતી, પરંતુ હવે છેલ્લા બે દિવસથી સરેરાશ 200થી 300 જેટલા બોક્સની આવક થઈ રહી છે, હજુ કેરીની સિઝનની શરૂઆત છે અને ભાવ પણ ઉંચા છે, પરંતુ કેરી વર્ષમાં એક જ વખત આવતી હોય ભલે ઉંચા ભાવો હોય, સ્વાદના શોખીનો મોંઘા ભાવની કેરી પણ લઈ રહ્યા છે અને આગામી દિવસોમાં ધીમે ધીમે આવક વધતાં કેરી પુરજોશમાં ઓછા ભાવમાં બજારમાં ઉપલબ્ધ થઈ જશે.