અરવલ્લીમાં અખાત્રીજે ખેડૂતોએ કર્યા હળોતરા, વર્ષો જૂની પરંપરા સાચવી
સંકેત પટેલ, અરવલ્લીઃ જિલ્લામાં દર વર્ષની જેમ આ વર્ષે પણ અખાત્રીજના શુભ દિને ધરતીપુત્રોએ વણજોયેલા મૂહુર્તમાં નવા કૃષિવર્ષનો ઉમંગભેર પ્રારંભ કર્યો હતો. નવા વર્ષ માટે ખેતી પાકોનું આયોજન કર્યું હતું. વર્ષો જૂની ચાલી આવતી પરંપરાને નિભાવી ખેડૂતોએ હળોતરા કર્યા હતા.
અરવલ્લીમાં અત્ર..તત્ર..સર્વત્ર.. ખેડૂતભાઈઓ ભારે ઉમંગે ખેતઓજારો, હળ તૈયાર કરી બળદોનાં શિંગડા રંગી નવા પોષાક પહેરી ખેતરે સાગમટે હળ જોડીને જઈને ખેતીનું મૂહુર્ત કર્યું હતું. દરવર્ષની જેમ આ વર્ષે પણ આજના શુભ દિને જિલ્લાના ઈસરોલ પંથકના સૌભૂમિપુત્રો એકસાથે જ હળ જોડીને ગામ નાજીકના એક મોટા ખેતરમાં જઈને ખેડ કરી નવા વર્ષનું ખેતીનું મુહૂર્ત સાગમટે કર્યું હતું.
ભલે આધુનિક ઓજાર તરીકે ટ્રેકટર હોય પણ ખેડૂતો આજે પણ હળોતરા તો બળદ થકી જ હળ જોડીને જ કરતા હોય છે. આજે દરેક ગામે ખેડૂતો સાગમટે નીકળીને ખેતરમાં હળ જોતરીને ગયા હતા અને ગામના કોઈપણ મોટા ખેતરમાં જઈને હળથી ચાસ પાડી ખેતર ખેડ્યાં હતા. નવા વર્ષની ખેતીનું મૂહુર્ત કર્યું હતું. ભૂમિપુત્રો નવા પોષાક પહેરી અને બળદોને સજાવીને અને લાકડાના હળને કુમકુમ તિલક કરી, બળદના શિંગડા રમજીના રંગથી રંગીને મોં મીઠું કરી તેમજ કંસાર જમીને બધા જ ખેડૂતો એકસાથે ઘરેથી નીકળી ખેતરે ગયા હતા. ત્યાં બધા જ એક સાથે હળ ચલાવી ખેતર ખેડી ખેતરમાં સાત ધાન્ય ઘઉં, મકાઈ, બાજરી, મઠ, મગનું વાવેતર કરી નવા કૃષિ વર્ષનો પ્રારંભ કર્યો હતો.
