ભારત અને પાકિસ્તાન તણાવ વચ્ચે એર ચીફ માર્શલની PM સાથે મુલાકાત
PM Modi: પહલગામ આતંકવાદી હુમલા અંગે સરકાર ગમે ત્યારે મોટો નિર્ણય લઈ શકે છે. પીએમ મોદી છેલ્લા કેટલાક દિવસોથી આ મુદ્દા પર વરિષ્ઠ સૈન્ય અધિકારીઓ સાથે અલગ-અલગ બેઠકો કરી રહ્યા છે. આ ક્રમમાં એર ચીફ માર્શલ એપી સિંહે રવિવારે પીએમ મોદીને મળ્યા. વાયુસેનાના વડા સાથેની આ મુલાકાત વડા પ્રધાન અને નૌકાદળના વડા એડમિરલ દિનેશ કે ત્રિપાઠી વચ્ચેની અલગ મુલાકાતના 24 કલાકથી પણ ઓછા સમયમાં થઈ. સૂત્રોના જણાવ્યા અનુસાર, આ બેઠકમાં પહલગામ આતંકવાદી હુમલા પછીની પરિસ્થિતિ પર ચર્ચા કરવામાં આવી હતી.
આ અઠવાડિયાની શરૂઆતમાં યોજાયેલી ઉચ્ચ-સ્તરીય બેઠકમાં વડાપ્રધાન મોદીએ સંરક્ષણ નેતૃત્વને સ્પષ્ટ સૂચના આપી હતી કે ભારતીય સશસ્ત્ર દળોને હુમલાના દેશના પ્રતિભાવની પ્રકૃતિ, લક્ષ્ય અને સમય નક્કી કરવાની સંપૂર્ણ સ્વતંત્રતા છે. છેલ્લી બેઠકમાં સંરક્ષણ પ્રધાન રાજનાથ સિંહ, રાષ્ટ્રીય સુરક્ષા સલાહકાર અજિત ડોભાલ, સંરક્ષણ સ્ટાફના વડા જનરલ અનિલ ચૌહાણ અને સેના, નૌકાદળ અને વાયુસેનાના વડાઓ હાજર હતા.
આ પણ વાંચો: ત્રણ દિવસ બાદ રાજ્યમાં અતિભારે વરસાદની આગાહીઃ હવામાન વિભાગ
પાકિસ્તાને ભારતીય જહાજો માટે બંદરો બંધ કર્યા
પહલગામ આતંકવાદી હુમલા બાદ ભારતે પાકિસ્તાન સામે નવા દંડાત્મક પગલાં લીધાના કલાકો પછી, પાકિસ્તાને પણ તાત્કાલિક અસરથી ભારતીય ધ્વજવાળા જહાજો માટે તેના બંદરો બંધ કરી દીધા છે. અગાઉ, ભારતે શનિવારે પાકિસ્તાન સાથેની તમામ ટપાલ સેવાઓ સ્થગિત કરી દીધી હતી અને ઇસ્લામાબાદ સામે નવા દંડાત્મક પગલાં તરીકે ભારતીય બંદરોમાં પાકિસ્તાની ધ્વજવાળા જહાજોના પ્રવેશ પર પ્રતિબંધ મૂક્યો હતો. ભારતે શનિવારે પાકિસ્તાનથી આવતા અથવા ત્યાંથી થતા માલની આયાત અને તેના બંદરોમાં પાકિસ્તાની જહાજોના પ્રવેશ પર પણ પ્રતિબંધ મૂક્યો હતો.
