Air Indiaની ફ્લાઈટમાં ફરી પેશાબકાંડ: એક મુસાફરે ખાનગી કંપનીના વરિષ્ઠ અધિકારી પર પેશાબ કર્યો
Air India Urinate Case: દિલ્હીથી બેંગકોક જતી એર ઈન્ડિયાની ફ્લાઇટ AI 2336ના બિઝનેસ ક્લાસમાં એક પુરુષ મુસાફરે એક ખાનગી કંપનીના વરિષ્ઠ અધિકારી પર પેશાબ કર્યો હતો. એર ઇન્ડિયાએ પણ આ ઘટનાની પુષ્ટિ કરી છે અને કહ્યું છે કે ક્રૂએ પણ પીડિત મુસાફરને ફરિયાદ નોંધાવવામાં મદદ કરવાની ઓફર કરી છે. જોકે, તેમણે ના પાડી. આ ઘટના ત્યારે બની જ્યારે ફ્લાઇટ બેંગકોકમાં લેન્ડિંગ કરી રહી હતી. આ પહેલા નવેમ્બર 2022માં પણ એર ઈન્ડિયાની ફ્લાઇટમાં પેશાબ કરવાનો કિસ્સો પ્રકાશમાં આવ્યો હતો.
મામલો વધી ગયા બાદ પેસેન્જરે પીડિતાની માફી પણ માંગી છે. એર ઇન્ડિયાના પ્રવક્તાએ જણાવ્યું હતું કે, “એર ઇન્ડિયા પુષ્ટિ આપે છે કે 9 એપ્રિલે દિલ્હીથી બેંગકોક જતી ફ્લાઇટ AI 2336માં કેબિન ક્રૂને એક બેકાબૂ મુસાફરના વર્તન વિશે જાણ કરવામાં આવી હતી.” ક્રૂએ બધી નિર્ધારિત પ્રક્રિયાઓનું પાલન કર્યું અને આ બાબતની જાણ અધિકારીઓને કરવામાં આવી છે.
એર ઈન્ડિયાની ફ્લાઇટમાં મુસાફર પર પેશાબ કરવાનો આ પહેલો કિસ્સો નથી. નવેમ્બર 2022 માં, જ્યારે એર ઇન્ડિયાની ન્યૂયોર્ક-દિલ્હી ફ્લાઇટમાં શંકર મિશ્રા નામના મુસાફરે એક મહિલા મુસાફર પર પેશાબ કર્યો હતો, ત્યારે આવો જ એક કિસ્સો પ્રકાશમાં આવ્યો હતો. આરોપીએ મુસાફરી દરમિયાન ચાર વખત દારૂ પીધો હતો. આ પછી, મિશ્રાની 6 જાન્યુઆરીએ બેંગલુરુથી ધરપકડ કરવામાં આવી હતી અને ત્યારબાદ કોર્ટે તેને ન્યાયિક કસ્ટડીમાં મોકલી દીધો હતો. જોકે, બાદમાં 31 જાન્યુઆરીએ કોર્ટે તેમને જામીન આપ્યા.
