31stની ઉજવણી માટે પોલીસ કમિશનરનું જાહેરનામું, વાંચો કયા કયા રસ્તા બંધ

અમદાવાદઃ શહેર પોલીસે 31 ફર્સ્ટની ઉજવણીને પોલીસ કમિશનરે જાહેરનામું પ્રસિદ્ધ કર્યું છે. જેમાં મોટા પ્રમાણમાં લોકો ઉજવણી માટે ભેગા થતા હોવાથી નીચે મુજબના વિવિધ પ્રતિબંધ મૂકવામાં આવ્યા છે.

1. સીજી રોડના સ્ટેડિયમ સર્કલથી પંચવટી સુધી 31 ડિસેમ્બરની સાંજે 6 વાગ્યાથી 1લી જાન્યુઆરી વહેલી સવારે 3 વાગ્યા સુધી તમામ પ્રકારનાં વાહનો માટે પ્રવેશબંધી કરવામાં આવી છે.

વૈકલ્પિક અવરજવરના રૂટઃ

• સમથેશ્વર મહાદેવથી બોડીલાઈન ચાર રસ્તા, ગુલબાઈ ટેકરાથી બોડીલાઈન ચાર રસ્તા થઇ સમથેશ્વર મહાદેવ તરફ બંને બાજુ રોડ ચાલુ રાખીને સીજી રોડ ક્રોસ કરી શકશે. પરંતુ સીજી રોડ ઉપર વાહન હંકારી શકાશે નહીં અને કલાક 8 કલાકથી તમામ વાહનવ્યવહાર બંધ કરવામાં આવશે.
• મીઠાખળી સર્કલથી ગિરીશ કોલ્ડ્રિંક્સ ચાર રસ્તા થઈ સેન્ટ ઝેવિયર્સ રોડ તથા નવરંગપુરા બસ સ્ટેન્ડથી સ્વસ્તિક ચાર રસ્તા થઈ કોમર્સ છ રસ્તા બંને બાજુ રોડ ચાલુ રાખીને સીજી રોડ ક્રોસ કરવાનો રહેશે, પરંતુ સીજી રોડ ઉપર વાહન હંકારી શકાશે નહીં અને કલાક 8 કલાકથી સદંતર વાહનવ્યવહાર બંધ કરવામાં આવશે.
• સીજી રોડ ઉપર આવેલી કાયદેસરની બંને બાજુ જે પાર્કિંગ વ્યવસ્થા રાખવામાં આવી છે તે પાર્કિંગ વ્યવસ્થા સાંજે 6 વાગ્યાથી બંધ રહેશે.

2. સિંધુભવન રોડ પર ઝાઝરમાન ચાર રસ્તાથી તાજ સ્કાયલાઈન ચાર રસ્તા સુધીનો બંને બાજુનો માર્ગ 31 ડિસેમ્બરે રાતે 8 વાગ્યાથી 1લી જાન્યુઆરી વહેલી સવારે 3 વાગ્યા સુધી તમામ પ્રકારના વાહનોની અવર-જવર માટે પ્રતિબંધિત રહેશે.

વૈકલ્પિક અવરજવરના રૂટ:

• ઝાઝરમાન ચાર રસ્તાથી અશ્વમેઘ બંગલો ચાર રસ્તા થઈ કાલીબારી મંદિર રોડ થઇ ઉમિયા ટ્રેડર્સ ટી થઈ તાજ સ્કાયલાઇન તરફ વાહનો અવર-જવર કરી શકાશે.
• ઝાઝરમાન ચાર રસ્તાથી બાગબાન ચાર રસ્તા થઈ આંબલી ઓવરબ્રિજ મધ્યભાગ થઈ શીલજ સર્કલ તરફ વાહનો અવર-જવર કરી શકાશે.

3. સમગ્ર શહેરમાં સવારે કલાક 8 કલાકથી રાત્રિના કલાક 11 સુધી ભારે તથા મધ્યમ પ્રકારનાં માલવાહક અને પેસેન્જર વાહનો તથા આમુખ (૨)થી સવાર કલાક 8 કલાકથી રાત્રિના કલાક 10 સુધી પેસેન્જર વાહનોની અવર-જવર ઉપર પ્રતિબંધ ફરમાવ્યો છે, તે પૈકી પેસેન્જર વાહન સિવાયનાં તમામ પ્રકારનાં વાહનો એસજી હાઇવે એટલે કે સરખેજ ગાંધીનગર હાઇવે ઉપર 31મી ડિસેમ્બરે રાતે 8 કલાકથી તારીખ 1લી જાન્યુઆરી વહેલી સવારે 3 વાગ્યા સુધી અવરજવર કરી શકશે નહીં. આ દરમિયાન વાહનચાલકોએ પ્રતિબંધિત વિસ્તાર સિવાયના સરદાર પટેલ રિંગ રોડનો ઉપયોગ કરવાનો રહેશે.

4. પકવાન ચાર રસ્તાથી સાણંદ ચોકડી સુધીના એસજી રોડ અને તેના સર્વિસ રોડ પર 31મી ડિસેમ્બરે સાંજે 7 વાગ્યાથી 1લી જાન્યુઆરી વહેલી સવારે 3 વાગ્યા સુધી વાહન પાર્કિંગ પર પ્રતિબંધ રહેશે.

5. નહેરુનગર સર્કલથી શિવરંજની ચાર રસ્તા થઈ ઇસ્કોન ચાર રસ્તા સુધીના રોડ પર ખાનગી લક્ઝરીના પાર્કિંગ ઉપર પણ આ સમય દરમિયાન પ્રતિબંધ રહેશે.