દિલ્હી સરકાર પ્રદુષણ ઓછું કરવા માટે એક્શન મોડમાં… CM રેખાએ આપ્યા આદેશ
Delhi: દિલ્હી સરકારે હવે રાજધાનીમાં પ્રદૂષણને કાબુમાં લેવાના પ્રયાસો શરૂ કર્યા છે. દિલ્હી સચિવાલયમાં દિલ્હીના મુખ્યમંત્રી રેખા ગુપ્તાની અધ્યક્ષતામાં વાયુ પ્રદૂષણને નિયંત્રિત કરવા માટે એક મહત્વપૂર્ણ બેઠક યોજાઈ હતી. આ બેઠક દરમિયાન દિલ્હી પર્યાવરણ મંત્રી મનજિન્દર સિંહ સિરસા સહિત શહેરી વિકાસ વિભાગ, MCD, DPCC, DDA, દિલ્હી ટ્રાફિક પોલીસ, PWD, મહેસૂલ, DSIIDC અને અન્ય તમામ સંબંધિત વિભાગોના વરિષ્ઠ અધિકારીઓ હાજર રહ્યા હતા.
બેઠક વિશે માહિતી આપતાં સીએમ રેખા ગુપ્તાએ જણાવ્યું હતું કે રાજધાનીમાં ધૂળનું પ્રદૂષણ ઘટાડવા માટે ચોમાસા સિવાય સમગ્ર વર્ષ દરમિયાન સ્પ્રિંકલર્સ અને સ્મોગ ગન તૈનાત કરવામાં આવશે. આનાથી હવાની ગુણવત્તામાં સુધારો થશે અને નાગરિકોને સ્વચ્છ હવા મળશે.
તેમણે કહ્યું કે વિભાગો પ્રદૂષણ પર કડક દેખરેખ રાખશે અને તાત્કાલિક કાર્યવાહી કરવામાં આવશે. આ સાથે સરહદી વિસ્તારોમાં વાહનોની તપાસ માટે એન્ફોર્સમેન્ટ ટીમ વધારવાની પણ સૂચના આપવામાં આવી છે અને તમામ રોડ માલિકી એજન્સીઓને રસ્તાઓના સમારકામ અને સફાઈ સંબંધિત સાપ્તાહિક અહેવાલો આપવા પણ સૂચના આપવામાં આવી છે.
આ પણ વાંચો: વસ્ત્રાલમાં અસામાજીક તત્વોએ ઘાતક હથિયારો સાથે મચાવ્યો આતંક, 11 શકમંદોની ધરપકડ
તેમણે કહ્યું કે આ સાથે તમામ સંબંધિત વિભાગોને એક અઠવાડિયા પછી એક્શન પ્લાન સાથે હાજર રહેવા સૂચના આપવામાં આવી છે. સીએમ રેખા ગુપ્તાએ જણાવ્યું હતું કે દિલ્હી સરકારે વડા પ્રધાન નરેન્દ્ર મોદીના માર્ગદર્શન હેઠળ વાયુ પ્રદૂષણ ઘટાડવાના પ્રયાસો વધુ તીવ્ર બનાવ્યા છે. વિકસિત દિલ્હી ઠરાવ હેઠળ રાજધાનીને સ્વચ્છ અને પ્રદૂષણ મુક્ત બનાવવા માટે તમામ જરૂરી તૈયારીઓ શરૂ કરી દેવામાં આવી છે.
