દક્ષિણ ગુજરાતના ખેડૂતોની હાલત કફોડી, મોટા ખેડૂતોને લીલા લ્હેર અને નાના ખેડૂતોને કોઈ ભાવ પણ નથી પૂછતું!
કિરણસિંહ ગોહિલ, સુરતઃ જિલ્લામાં સહકારી ક્ષેત્ર હવે રાજકીય અખાડો બની ગયા છે અને એના કારણે નાના ખેડૂતોની હાલત દયનીય બની ગઈ છે. સામાન્ય રીતે શેરડી વાવણીથી લઈ કાપણી સુધી ખેડૂત કાળી મજૂરી કરે છે અને મોંઘી ખેતી કરી પાક તૈયાર કરે છે. પરંતુ તેની કાપણી 12થી 13 મહિનામાં સુગર દ્વારા શેરડી કટિંગ આવી જાય છે. પરંતુ સુરતના માંગરોળ તાલુકામાં 18 મહિના પછી પણ કાપણી આવી નથી. શેરડી ખેતરમાં પડી પડી બાણીયા બની રહી છે અને બીજી તરફ સહકારી મંડળીઓમાંથી લીધેલું ખાતર, બિયારણ અને એગ્રી કલ્ચરના વીજ કનેક્શનના બિલ ભરવા ખેડૂતો પાસે પૈસા નથી. વીજ કંપનીના અધિકારી માર્ચ એન્ડિંગનું બહાનું બતાવી ખેડૂતોને બિલ ભરવા રીતસર ધમકાવી રહ્યા છે. ત્યારે આવી પરિસ્થિતિમાં બિચારો ખેડૂત એટલું જ કહી રહ્યો છે, શેરડી કાપણી કરે અને પૈસા આવે એટલે ભરી જઈશું પણ કોઈ ખેડૂતનું સાંભળવા તૈયાર નથી.
દક્ષિણ ગુજરાતને સહકારી ક્ષેત્રનું હબ માનવામાં આવે અને તેમાંય સૌથી વધુ સુગર મિલો દક્ષિણ ગુજરાતમાં આવેલી છે. તેમાંય સુરત જિલ્લામાં સૌથી વધુ સુગર મિલો છે, તો ખેડૂતોની હાલત સારી હોવી જોઈએ. પરંતુ કમનસીબે એવું નથી. આટલી બધી સુગર મિલો હોવા છતાં નાના ખેડૂતોની હાલત દયનીય છે. ચારે દિશામાંથી ખેડૂતો પર આફત આવી છે. ત્યારે સુરતના માંગરોળ તાલુકાના ખેડૂતો કહી રહ્યા છે કે, અમારે નેતા-સહકારી આગેવાનોના ખભે માથું મૂકી પોક મૂકીને રડવું છે. પણ એ પણ આ દક્ષિણ ગુજરાતમાં શક્ય નથી. કારણ કે, આ સુગર મિલોમાં બિનસભાસદ અને મોટા ખેડૂતોને લીલા લહેર છે પણ સામાન્ય અને નાના ખેડૂતોની હાલત દયનીય બની ગઈ છે.
માંગરોળ તાલુકાના ખેડતો સુગર મિલોના સંચાલકો પર ગંભીર આક્ષેપ કરી રહ્યા છે કે, બિનસભાસદ અને મોટા ખેડૂતો અને સુગર મિલોમાં ચૂંટાઈને આવેલા નેતાઓનાં કામ ફટાફટ થાય છે પણ નાના ખેડૂતોનું કોઈ સાંભળતું નથી. સામાન્ય રીતે શેરડી વાવ્યાં બાદ 12થી 13 મહિનામાં શેરડી કાપણી લાયક બની જાય છે. અફસોસ છે કે, 18 મહિના પછી પણ કાપણી આવતી નથી. શેરડીનો ઉભો પાક સૂકાઈ રહ્યો છે. શેરડીનું વજન ઘટી રહ્યું છે, જેના કારણે ખેડૂતોને ઓછો ભાવ મળે છે અને સમયસર શેરડીના પૈસા નહીં મળે ખેડૂતની સ્થિતિ કપરી બની જાય છે.
બીજી તરફ પાણીનો પિયાવો, એગ્રી કલ્ચર લાઈનનું બિલ, ખાતર, દવા સહકારી મંડળીમાંથી ખરીદી હોય એ મંડળીને સમયસર પૈસા ચૂકવાતા નથી. વીજ કંપનીવાળા માર્ચ એન્ડિંગ ચાલે છે કહી ખેડૂતોના એગ્રી કલ્ચર લાઇનનું કનેક્શન કાપવાની ધમકી આપે છે. ખેડૂત બિચારો બની ગયો છે. ખેડૂત વેદના વ્યક્ત કરતા કહેતો હતો કે, મારે પોક મૂકીને રડવું છે. મોદી સાહેબના ખભે માથું મૂકીને રડવું છે. સહકાર મંત્રીના ખભે માથું મૂકી રડવું છે. વીજ કંપનીના અધિકારી અને સહકારી આગેવાનોના ખભે માથું મૂકી રડવું છે. પણ આ બધું શક્ય નથી એટલે ખેતરમાં કપાયેલી શેરડીના ઢગલા વચ્ચે બેસી પોક મૂકીને રડી લઈએ છીએ.
હાલ શેરડીના કટિંગ ચાલી રહ્યા છે પણ નાના ખેડૂતોની શેરડી ઉભી છે. તો કેટલીક જગ્યા પર કપાયેલી શેરડી પડી છે. જે તાપમાં તપી બાણીયા બની ગઈ છે. જેના કારણે શેરડીનું વજન ઘટી રહ્યું છે અને જેના કારણે ખેડૂતોને ભારે નુકસાન થઈ રહ્યું છે. શેરડીનું કટિંગ સમયસર નહીં આવતા ખેડૂત રાતાપાણીએ રડી રહ્યો છે. મુસીબત તેમના ખેતરથી ઘર સુધી પહોંચી છે. કોઈ બિયારણ, ખાતરના પેસા માટે ફોન કરે છે, કોઈ વિજબીલ માટે તો કોઈ ખેતી માટે ઉછીના લીધેલા પૈસા માટે. ત્યારે ખેડૂત બધાને એક જ વાત કરે છે કે, શેરડીના પૈસા આવશે એટલે આપી દઈશ. પણ કોઈ સાંભળવા તૈયાર નથી.
