શ્રીલંકાએ 34 ભારતીય માછીમારોની ધરપકડ કરી, CM સ્ટાલિને કેન્દ્ર સરકારને કરી મોટી અપીલ

Sri Lanka: શ્રીલંકાના નૌકાદળે ફરી એકવાર મોટી સંખ્યામાં ભારતીય માછીમારોની ધરપકડ કરી છે. શ્રીલંકાના નૌકાદળ દ્વારા બે અલગ અલગ ઘટનાઓમાં ઓછામાં ઓછા 34 ભારતીય માછીમારોની ધરપકડ કરવામાં આવી છે, એમ અધિકારીઓએ રવિવારે જણાવ્યું હતું. આ સાથે માછીમારોની બોટ પણ જપ્ત કરવામાં આવી છે. આ ધરપકડ તમિલનાડુના ધનુષકોડી નજીક કરવામાં આવી છે. આ ઘટના બાદ તમિલનાડુના મુખ્યમંત્રી એમકે સ્ટાલિને કેન્દ્ર સરકારને આ મામલે નક્કર રાજદ્વારી પગલાં ભરવાની અપીલ કરી છે.

નક્કર પગલાં ભરવા અપીલ
તમિલનાડુના મુખ્યમંત્રી એમકે સ્ટાલિને કેન્દ્ર સરકારને માછીમારોને બચાવવા માટે કાર્યવાહી કરવા વિનંતી કરી છે. સ્ટાલિને જણાવ્યું હતું કે ધરપકડ કરાયેલા માછીમારોમાં 32 તમિલનાડુના અને 2 કેરળના છે. સ્ટાલિને કહ્યું, “આપણા માછીમારોની વારંવાર અટકાયતથી દરિયાકાંઠાના સમુદાયોમાં તેમના ભવિષ્ય અંગે ચિંતા પેદા થઈ છે. હવે સમય આવી ગયો છે કે શ્રીલંકન નૌકાદળ દ્વારા આપણા માછીમારોની ધરપકડ ન થાય તે માટે પગલાં લેવામાં આવે.” નક્કર રાજદ્વારી પગલાં લેવા જોઈએ. “

આ પણ વાંચો: રાજ્યમાં ફરી ઠંડીનો ચમકારો, નલિયામાં સૌથી ઓછું 6 ડિગ્રી તાપમાન નોંધાયું

શ્રીલંકાએ શું કહ્યું?
શ્રીલંકાના અધિકારીઓએ જણાવ્યું છે કે નૌકાદળે 25 અને 26 જાન્યુઆરીના રોજ શ્રીલંકાના જળસીમામાં મન્નાર જિલ્લાના દરિયાકાંઠે નિયમિત પેટ્રોલિંગ દરમિયાન બંનેની ધરપકડ કરી હતી. ધરપકડ કરાયેલા ભારતીય માછીમારોને આગળની કાર્યવાહી માટે સંબંધિત અધિકારીઓને સોંપવામાં આવ્યા છે. શ્રીલંકાએ માછીમારો પર ગેરકાયદેસર રીતે માછીમારી કરવાનો આરોપ લગાવ્યો છે.