વર્ષ 2024 માટે ભૌતિકશાસ્ત્રના ક્ષેત્રમાં નોબેલ પુરસ્કારોની જાહેરાત
Nobel Prize: વર્ષ 2024 માટે નોબેલ પુરસ્કાર હેઠળ ભૌતિકશાસ્ત્રના ક્ષેત્ર માટેના મંગળવારે નોબેલ પુરસ્કારોની જાહેરાત કરવામાં આવી. રોયલ સ્વીડિશ એકેડેમી ઓફ સાયન્સે જ્હોન જે. હોપફિલ્ડ અને જ્યોફ્રી ઇ. હિન્ટનને ભૌતિકશાસ્ત્રનો નોબેલ પુરસ્કાર આપવાની જાહેરાત કરી. તેઓને કૃત્રિમ ન્યુરલ નેટવર્ક સાથે મશીન લર્નિંગને સક્ષમ કરતી તેમની મૂળભૂત શોધો માટે આ પુરસ્કાર આપવાનું નક્કી કરવામાં આવ્યું છે.
ગઇકાલે ચિકિત્સા ક્ષેત્ર માટે કરાઇ હતી નોબેલ પુરસ્કારની જાહેરાત
આ પહેલા, ગઇકાલે સોમવારથી વર્ષ 2024 માટે નોબેલ પુરસ્કારોની જાહેરાત શરૂ કરવામાં આવી. જે અંતર્ગત ગઇકાલે ફિઝિયોલોજી અથવા મેડિસિન ક્ષેત્ર માટે આ સન્માનના વિજેતાઓના નામની જાહેરાત કરવામાં આવી. આ વર્ષે અમેરિકાના વિક્ટર એમ્બ્રોસ અને ગેરી રુવકુનને મેડિસિનનું નોબેલ પુરસ્કાર એનાયત કરવામાં આવ્યું. માઇક્રો RNAની શોધ માટે બંનેને આ સન્માન આપવામાં આવશે.
2023 માટે ભૌતિકશાસ્ત્ર શ્રેણીમાં કોને મળ્યો હતો નોબેલ?
અગાઉ, ગયા વર્ષે એટલે કે 2023માં ભૌતિકશાસ્ત્ર કેટેગરીમાં નોબેલ પુરસ્કાર સંયુક્ત રીતે પિયર ઓગસ્ટિની, ફેરેન્ક ક્રાઉસ અને એન લ’હુલિયરને આપવામાં આવ્યો હતો. આ સન્માન ઈલેક્ટ્રોન પરના અભ્યાસ માટે આપવામાં આવ્યું હતું. આ પુરસ્કાર પ્રાયોગિક પદ્ધતિઓ માટે આપવામાં આવ્યો હતો જેમાં પદાર્થમાં ઇલેક્ટ્રોનની ગતિશીલતાનો અભ્યાસ કરવા માટે પ્રકાશના એટોસેકન્ડ પલ્સ જનરેટ કરવામાં આવ્યા હતા. એની હુઈલિયર ભૌતિકશાસ્ત્રના આ ક્ષેત્રમાં નોબેલ જીતનારી પાંચમી મહિલા બની.
2022માં આમને મળ્યું હતું નોબેલ સન્માન
2022નું ભૌતિકશાસ્ત્રનું નોબેલ પુરસ્કાર સંયુક્ત રીતે એલેન એસ્પેક્ટ, જ્હોન એફ. ક્લોઝર અને એન્ટોન ઝીલિંગરને એનાયત કરવામાં આવ્યું હતું. એલેન એસ્પેક્ટ ફ્રેન્ચ ભૌતિકશાસ્ત્રી છે, જ્યારે જ્હોન એફ. ક્લોઝર અમેરિકન વૈજ્ઞાનિક છે અને એન્ટોન ઝીલિંગર ઑસ્ટ્રિયન વૈજ્ઞાનિક છે. આ વૈજ્ઞાનિકોના પ્રયોગોએ ક્વોન્ટમ માહિતીના આધારે નવી ટેકનોલોજીનો માર્ગ મોકળો કર્યો હતો.
ચિકિત્સા ક્ષેત્રે નોબેલ પુરસ્કાર
2023માં ચિકિત્સા ક્ષેત્રે આમને મળ્યો હતો નોબેલ
આ પહેલા ગત વર્ષે 2023માં કેટાલિન કેરીકો અને ડ્રૂ વીસમેનને મેડિસિન ક્ષેત્રે નોબેલ પુરસ્કાર એનાયત કરવામાં આવ્યો હતો. તેમને ન્યુક્લિયોસાઇડ બેઝ મોડિફિકેશન સંબંધિત તેમની શોધ માટે આ સન્માન આપવામાં આવ્યું હતું. આ શોધે કોરોનાવાયરસ એટલે કે કોવિડ-19 સામે અસરકારક mRNA રસીઓ વિકસાવવામાં મદદ કરી.
2022માં સ્વીડનના સ્વાંતે પાબોને અપાયો હતો આ એવોર્ડ
વર્ષ 2022માં સ્વીડનના સ્વાંતે પાબોને ફિઝિયોલોજી અથવા મેડિસિન ક્ષેત્રે નોબેલ પુરસ્કાર એનાયત કરવામાં આવ્યો હતો. તેમને લુપ્ત થઈ ગયેલા હોમિનિન્સ અને માનવ ઉત્ક્રાંતિના જિનેટિક્સ (જીનોમ) સંબંધિત તેમની શોધ માટે આ પુરસ્કાર આપવામાં આવ્યો હતો. નોબેલ કમિટીએ એક નિવેદન જાહેર કરીને જણાવ્યું હતું કે કોરોલિન્સ્કા ઇન્સ્ટિટ્યૂટની નોબેલ કમિટીએ આજે લુપ્ત થઈ ગયેલા હોમિનિન્સ અને માનવ ઉત્ક્રાંતિના જનીનો સંબંધિત શોધ માટે સ્વાંતે પાબોને ફિઝિયોલોજી અથવા મેડિસિનનું 2022 નોબેલ પુરસ્કાર આપવાનું નક્કી કર્યું છે. સ્વાંતે પાબોને તેમના સંશોધનમાં જાણવા મળ્યું હતું કે લુપ્ત થઈ ગયેલા હોમિનિન જનીનો હોમો સેપિયન્સમાં ટ્રાન્સફર કરવામાં આવ્યા હતા. પાબો પેલેઓજેનેટિક્સના સ્થાપકોમાંના એક છે જે નિએન્ડરથલ જીનોમ પર વ્યાપકપણે કામ કર્યું છે. તેઓ જર્મનીના લેઇપઝિગમાં મેક્સ પ્લાન્ક ઇન્સ્ટિટ્યૂટ ફોર ઇવોલ્યુશનરી એન્થ્રોપોલોજીમાં ડિપાર્ટમેન્ટ ઓફ જિનેટિક્સનાં ડિરેક્ટર પણ રહી ચૂક્યાં છે.
