5 લાખ ઇમિગ્રન્ટ્સને મળશે અમેરિકન નાગરિકતા, બાઇડેન સરકાર લેશે આ પગલાં!
US Joe Biden: અમેરિકી રાષ્ટ્રપતિ જો બાઇડેન ટૂંક સમયમાં એક મોટી જાહેરાત કરવા જઈ રહ્યા છે. આનાથી દસ્તાવેજો વિના રહેતા અમેરિકન નાગરિકોના ભાગીદારોને અમેરિકન નાગરિકતા મેળવવાનું સરળ બનશે. અમેરિકામાં રહેતા લાખો ભારતીયોને પણ આનો લાભ મળવાની આશા છે. ન્યૂયોર્ક ટાઈમ્સના રિપોર્ટ અનુસાર, આ પ્રોટેક્શન પ્રોગ્રામ એવા ઈમિગ્રન્ટ્સ માટે હશે જેઓ અમેરિકામાં ગેરકાયદેસર રીતે રહે છે, પરંતુ અમેરિકન નાગરિક સાથે લગ્ન કર્યા છે. આનાથી તેમના માટે વર્કિંગ પરમિટ અને નાગરિકતા મેળવવાનું સરળ બનશે.
એનબીસી ન્યૂઝ અનુસાર, ‘પેરોલ ઇન પ્લેસ’ નામના આ પ્રોગ્રામથી અમેરિકામાં ગેરકાયદેસર રીતે રહેતા લગભગ પાંચ લાખ ઇમિગ્રન્ટ્સને ફાયદો થશે. આ તેમને દેશનિકાલથી બચાવશે. આ પ્રોગ્રામનો હેતુ બિનદસ્તાવેજીકૃત ઇમિગ્રન્ટ્સ માટે ગ્રીન કાર્ડ અને યુએસ નાગરિકતા મેળવવાની પ્રક્રિયાને સરળ બનાવવાનો છે. એનબીસી ન્યૂઝ અનુસાર, બિનદસ્તાવેજીકૃત જીવનસાથીઓને પણ કેસ-બાય-કેસ આધારે વર્ક પરમિટ મેળવવાની મંજૂરી આપવામાં આવશે.
જો કે, આ માટે કેટલીક શરતો છે. ઉદાહરણ તરીકે અમેરિકન નાગરિક સાથે લગ્ન કર્યા પછી ઓછામાં ઓછા 10 વર્ષથી અમેરિકામાં રહેતા ઇમિગ્રન્ટ્સને જ નાગરિકતા આપવામાં આવશે. આ સાથે આવા ઇમિગ્રન્ટ બાળકો પણ ગ્રીન કાર્ડ અથવા નાગરિકતા મેળવી શકશે. જેમના માતા અથવા પિતાએ અમેરિકન નાગરિક સાથે લગ્ન કર્યા છે.
આ પણ વાંચો: શ્રીલંકા વિરૂદ્ધ સિરીઝ માટે ભારતીય ટીમમાં વાપસી કરી શકે છે આ ખેલાડી
હાલમાં જો કોઈ અમેરિકન નાગરિક સાથે લગ્ન કર્યા હોવા છતાં એક વર્ષ કે તેથી વધુ સમય સુધી દસ્તાવેજો વગર અમેરિકામાં રહે છે તો તેને કાયદાકીય કાર્યવાહીનો સામનો કરવો પડે છે. આવી વ્યક્તિ પર 10 વર્ષ માટે અમેરિકામાં પ્રવેશવા પર પણ પ્રતિબંધ છે. આ લાભ માત્ર એવા ઇમિગ્રન્ટ્સને જ મળશે જેમનો 10 વર્ષનો કાર્યકાળ 17 જૂન સુધીમાં પૂરો થયો હશે. એનબીસી ન્યૂઝ અનુસાર બાઇડેન સરકારની આ પહેલનો એક ઉદ્દેશ્ય એવા બિનદસ્તાવેજીકૃત ઇમિગ્રન્ટ્સને મદદ કરવાનો છે જેઓ એક વિદ્યાર્થી તરીકે અમેરિકા આવે છે અને પછી અમેરિકન નાગરિક સાથે લગ્ન કરીને અહીં સ્થાયી થાય છે.
ભૂતપૂર્વ રાષ્ટ્રપતિ ડોનાલ્ડ ટ્રમ્પે તેની ટીકા કરી છે અને તેને ‘અસ્થિર’ ગણાવી છે. જો તેઓ પ્રમુખ બનશે તો તેમણે બિનદસ્તાવેજીકૃત ઇમિગ્રન્ટ્સને દેશનિકાલ કરવાનું વચન પણ આપ્યું છે. આ વર્ષે નવેમ્બરમાં રાષ્ટ્રપતિની ચૂંટણી યોજાવાની છે. તેથી બાઇડેનના આ પગલાને મોટો માસ્ટરસ્ટ્રોક માનવામાં આવી રહ્યો છે. જો કે હજુ આ કાર્યક્રમ સત્તાવાર રીતે શરૂ થયો નથી.
