‘આગામી દિવસોમાં પણ ફ્લાઈટ્સ કેન્સલ થઈ શકે છે’, જાણો સીઈઓએ સહકર્મીઓને શું કહ્યું?

Air India Express: એર ઈન્ડિયા એક્સપ્રેસના સીઈઓએ સોશિયલ મીડિયા પોસ્ટમાં જણાવ્યું કે મંગળવાર સાંજથી અમારા કેબિન ક્રૂના 100 સભ્યો બીમાર પડ્યા હોવાની જાણ થઈ છે. રોસ્ટરમાં ફ્લાઇટ ડ્યૂટી ઉમેર્યા બાદ છેલ્લી ઘડીએ આ માહિતી આપવાને કારણે અમારી ફ્લાઇટ્સનું સંચાલન ખરાબ રીતે પ્રભાવિત થયું હતું.

હવે સીઈઓ આલોક સિંહે એર ઈન્ડિયા એક્સપ્રેસ ફ્લાઈટ્સ રદ કરવા અંગે પોતાની પ્રતિક્રિયા આપી છે. ક્રૂની સમસ્યાઓ વચ્ચે એર ઈન્ડિયા એક્સપ્રેસના સીઈઓ આલોક સિંહે કહ્યું કે આગામી થોડા દિવસોમાં ફ્લાઈટ્સની સંખ્યામાં વધુ ઘટાડો થઈ શકે છે.

નોંધનીય છે કે, અગાઉ એર ઈન્ડિયા એક્સપ્રેસના ક્રૂ મેમ્બર્સ સિક લીવ પર જવાથી ઘણી સમસ્યા સર્જાઈ હતી. એર ઈન્ડિયા એક્સપ્રેસના કર્મચારીઓની આ કાર્યવાહીને કારણે 07 મે મંગળવાર રાતથી બુધવાર સવાર સુધી 70થી વધુ ડોમેસ્ટિક અને ઈન્ટરનેશનલ ફ્લાઈટ્સ કેન્સલ કરવામાં આવી છે. માહિતી આપતા, એર ઈન્ડિયા એક્સપ્રેસના પ્રવક્તાએ જણાવ્યું કે એરલાઈન્સના કેબિન ક્રૂના એક જૂથે ગઈકાલે રાત્રે છેલ્લી ક્ષણે બીમાર હોવાની જાણ કરી હતી, જેના કારણે ફ્લાઈટ મોડી પડી હતી અને ફ્લાઈટ કેન્સલ કરવી પડી હતી. જ્યારે અમે આ ઘટનાઓ પાછળના કારણોને સમજવા માટે ક્રૂ સાથે વાતચીત કરી રહ્યા છીએ. એરલાઇન ટીમો આ સમસ્યાને સક્રિયપણે શોધી રહી છે અને સમસ્યાને ઉકેલવાનો પ્રયાસ કરી રહી છે.