Budget 2025: સ્ટોક અને મ્યુચ્યુઅલ ફંડ રોકાણકારો માટે સરકારની મોટી ભેટ
Budget 2025: નાણામંત્રી નિર્મલા સીતારમણે આજે સંસદમાં નાણાકીય વર્ષ 2025-26 માટેનું બજેટ રજૂ કર્યું. નાણામંત્રીએ આજે મધ્યમ વર્ગ માટે મોટી રાહતની જાહેરાત કરી અને નવી કર પ્રણાલી હેઠળ 12 લાખ રૂપિયા સુધીની આવકને કરમુક્ત કરવાની જાહેરાત કરી. જ્યારે નોકરી કરતા લોકો માટે 12.75 લાખ રૂપિયા સુધીની આવક પર કોઈ ટેક્સ નહીં લાગે. આ સાથે, સરકારે શેર અને મ્યુચ્યુઅલ ફંડ રોકાણકારો દ્વારા મળતા ડિવિડન્ડ પર લાદવામાં આવતી TDSની મર્યાદા વધારવાની પણ જાહેરાત કરી.
10,000 રૂપિયા સુધીના ડિવિડન્ડ આવક પર ટીડીએસ કાપવામાં આવશે નહીં
નાણામંત્રીએ ડિવિડન્ડ આવક પર કાપવામાં આવતા TDSની મર્યાદા રૂ. 5,000 થી વધારીને રૂ. 10,000 કરવાની જાહેરાત કરી. આનો અર્થ એ થયો કે રોકાણકારોને વર્ષમાં મળેલા 10,000 રૂપિયા સુધીના ડિવિડન્ડ પર 1 રૂપિયાનો પણ ટીડીએસ વસૂલવામાં આવશે નહીં. જોકે, 10,000 રૂપિયાથી વધુના ડિવિડન્ડ પર 10 ટકા ટીડીએસ કાપવામાં આવશે. આ નવો નિયમ 1 એપ્રિલ, 2025થી અમલમાં આવશે. તમને જણાવી દઈએ કે 5000 રૂપિયાથી વધુના ડિવિડન્ડના કિસ્સામાં, કંપની 10 ટકા ટીડીએસ કાપીને રોકાણકારોના ખાતામાં પૈસા ટ્રાન્સફર કરે છે.
ડિવિડન્ડ પર કાપવામાં આવતા TDSનું ગણિત ઉદાહરણ સાથે સમજો
ઉદાહરણ તરીકે, રમેશ પાસે ABC કંપનીના 1000 શેર છે. કંપનીએ દરેક શેર પર 10 રૂપિયાના ડિવિડન્ડની જાહેરાત કરી છે. આ મુજબ, રમેશને કુલ 10,000 રૂપિયા ડિવિડન્ડ તરીકે મળશે. નવા નિયમો હેઠળ, રમેશને મળતા ડિવિડન્ડ પર કોઈ TDS કાપવામાં આવશે નહીં. જ્યારે વર્તમાન નિયમો હેઠળ, 10,000 રૂપિયાના ડિવિડન્ડ પર 10 ટકા (1,000 રૂપિયા) TDS કાપ્યા પછી, રમેશના બેંક ખાતામાં ફક્ત 9,000 રૂપિયા જ આવશે. આનો સીધો અર્થ એ છે કે નવી સિસ્ટમ હેઠળ રોકાણકારો ઘણી બચત કરશે.
