વડોદરામાં ટ્યુશન ક્લાસના શિક્ષકે 11 વર્ષીય કિશોરીને અડપલાં કર્યા, આરોપીની ધરપકડ
વડોદરાઃ સંસ્કારી નગરી વડોદરાને શર્મશાર કરતો કિસ્સો સામે આવ્યો છે. શહેરના તરસાલી વિસ્તારમાં આવેલા આઇડલ ક્લાસિસના શિક્ષકે વિદ્યાર્થિની સાથે શારીરિક અડપલાં કરતા ચકચાર મચી ગઈ છે. ત્યારે આ સમગ્ર મામલે પોલીસ ફરિયાદ કરવામાં આવી હતી અને પોલીસે આરોપી શિક્ષકની ધરપકડ કરી છે.
આ મામલે માહિતી આપતા એસીપી પ્રણવ કટારીયા જણાવે છે કે, તરસાલીમાં આવેલા આઇડલ ક્લાસિસની 11 વર્ષીય કિશોરી સાથે શિક્ષકે શારીરિક અડપલાં કર્યા છે. શિક્ષકે અન્ય વિદ્યાર્થીઓને પાર્ટી કરવાનાના પૈસા આપી બહાર મોકલ્યા હતા. ત્યારબાદ આ બાળકીને ખોળામાં બેસાડી શારીરિક અડપલાં કર્યા હતા.
છેલ્લા એક વર્ષથી કિશોરી ટ્યુશન કલાસમાં અભ્યાસ કરવા જતી હતી. ત્યારે આ મામલે પોલીસ ફરિયાદ નોંધાતા પોલીસે આરોપી લંપટ શિક્ષક નીતિન ચૌહાણની ધરપકડ કરી હતી. હવસખોર શિક્ષક એક ખાનગી શાળા સહિત આઇડલ ક્લાસિસમાં નોકરી કરતો હતો. ક્લાસિસના અમુક સીસીટીવી બંધ છે, ચાલુ સીસીટીવીની મદદથી પોલીસે તપાસ હાથ ધરી છે.
