લદ્દાખના લોકોને કેન્દ્ર સરકારની ભેટ, સરકારી નોકરીઓમાં સ્થાનિક લોકોને 95% અનામતનો પ્રસ્તાવ

LADAKH: કેન્દ્રશાસિત પ્રદેશ લદ્દાખ સુવિધાઓના અભાવ અને સ્થાનિક સમસ્યાઓના કારણે લાંબા સમયથી સમાચારમાં છે. સોનમ વાંગચુકે આ સમસ્યાઓ સામે ઘણા વિરોધ પ્રદર્શનો યોજ્યા. ભૂખ હડતાળનો પણ આશરો લીધો હતો. જો કે હવે કેન્દ્ર સરકારે લદ્દાખના લોકો માટે મોટી રાહતની જાહેરાત કરી છે.

તાજેતરની ઉચ્ચ સ્તરીય બેઠક પછી કેન્દ્રીય ગૃહ મંત્રાલય (MHA) એ લદ્દાખમાં સ્થાનિક લોકો માટે સરકારી નોકરીઓમાં 95 ટકા અનામત આપવાનો નિર્ણય લીધો છે. આ સાથે પહાડી પરિષદોમાં મહિલાઓ માટે એક તૃતીયાંશ અનામતનો પ્રસ્તાવ પણ મૂકવામાં આવ્યો છે. એક અહેવાલ અનુસાર આ માહિતી ભારતીય જનતા પાર્ટીના પૂર્વ સાંસદ અને લેહ એપેક્સ બોડી (LB)ના પ્રમુખ થુપસ્તાન ચેવાંગે આપી હતી. આ બેઠકમાં જમીન અધિકારો અને તેમની સંબંધિત ચિંતાઓ પર પણ સર્વસંમતિ સધાઈ હતી.

લદ્દાખના લોકોની મુખ્ય માંગણીઓ
5 ઓગસ્ટ 2019 ના રોજ, જ્યારે કેન્દ્ર સરકારે જમ્મુ અને કાશ્મીરનો વિશેષ દરજ્જો સમાપ્ત કર્યો, ત્યારે તેને બે કેન્દ્રશાસિત પ્રદેશોમાં વહેંચવામાં આવ્યું. જ્યારે જમ્મુ અને કાશ્મીરને તેની પોતાની વિધાનસભા આપવામાં આવી હતી. જ્યારે લદ્દાખ આ સુવિધાથી વંચિત હતું. શરૂઆતમાં લદ્દાખના લોકો તેનાથી સંતુષ્ટ હતા. પરંતુ 2020માં વિરોધ શરૂ થયો. છેલ્લા કેટલાક વર્ષોમાં લદ્દાખના લોકો ચાર મુખ્ય માંગણીઓ માટે સંઘર્ષ કરી રહ્યા છે.

લદ્દાખ માટે રાજ્યનો દરજ્જો
બંધારણની છઠ્ઠી અનુસૂચિમાં સમાવેશ કરીને આદિવાસી વિસ્તારનો દરજ્જો.
સ્થાનિક લોકો માટે નોકરીઓમાં આરક્ષણ.
લેહ અને કારગીલ માટે અલગ સંસદીય બેઠકો.