સુરત નવી હોસ્પિટલમાંથી નવજાત બાળકની ચોરી, 3 કલાક રેકી કરી બાળક ચોર્યું

અમિત રુપાપરા, સુરતઃ વિવાદોનું પર્યાય બની ચૂકેલી નવી સિવિલ હોસ્પિટલ ફરી એક વખત વિવાદમાં આવી છે. નવી સિવિલ હોસ્પિટલમાં ફરી એક વખત બાળકની ચોરી થઈ હોવાની ઘટના સામે આવી છે. સ્ટેમ્પ સેલ બિલ્ડિંગમાં શુક્રવારે રાત્રે હોસ્પિટલના ડિલિવરી રૂમમાંથી એક નવજાત બાળકની ચોરી થતા હોસ્પિટલ તંત્ર દોડતું થયું હતું. આ સમગ્ર મામલે સુરત ક્રાઈમ બ્રાન્ચ અને સ્થાનિક પોલીસ દ્વારા બાળકની ચોરી કરનારા મહિલાની શોધખોળ હાથ ધરવામાં આવી રહી છે.

સુરતના બમરોલી રોડ પર ગોવર્ધન નગરમાં ધીરજ શુક્લા પરિવાર સાથે રહે છે. ધીરજ શુક્લાની પત્ની સંધ્યાને શુક્રવારે સવારે પ્રસુતિનો દુખાવો ઉપડતા નવી સિવિલ હોસ્પિટલમાં સારવાર માટે લઈ જવામાં આવી હતી. નવી સિવિલ હોસ્પિટલની સ્ટેમ્પ સેલ બિલ્ડિંગમાં સંધ્યાની પ્રસૂતિ થઈ હતી અને બપોરના સમયે સંધ્યાએ બાળકને જન્મ આપ્યો હતો. સંધ્યાને પ્રસુતિ બાદ વધુ સારવાર માટે હોસ્પિટલમાં બીજા માટે દાખલ કરવામાં આવી હતી.

સંધ્યાની પ્રસૂતિ થયા બાદ એક મહિલા ત્રણ કલાક તેની સાથે રહી હતી અને ત્યારબાદ સાંજે 7 વાગ્યે સંધ્યાની નજર ચૂકવીને સંધ્યાના બાળકની ચોરી કરીને પલાયન થઈ ગઈ હતી. સંધ્યા અને તેના પરિવારના સભ્યોને આ બાબતે માહિતી મળતા તેને તાત્કાલિક અસરથી હોસ્પિટલ સ્ટાફની માહિતી આપી હતી અને ત્યારબાદ હોસ્પિટલ દ્વારા સ્થાનિક પોલીસને આ બાબતે જાણ કરવામાં આવી હતી.

તો બીજી તરફ હોસ્પિટલના સીસીટીવી ફૂટેજ પોલીસ દ્વારા ચેક કરવામાં આવતા પોલીસના ધ્યાને આવ્યું હતું કે, મહિલાની નજર 3 કલાકથી આ બાળક પર હતી અને બાળકની માતાની નજર ચૂકવીને મહિલા સાવચેતીપૂર્વક બાળકને થેલામાં મૂકી હોસ્પિટલની બહાર લઈ ગઈ હતી. તો આ સમગ્ર ઘટનાને ગંભીરતાથી ધ્યાનમાં લઇ તાત્કાલિક અસરથી સુરત ક્રાઈમ બ્રાન્ચ દ્વારા તેમજ ખટોદરા પોલીસ દ્વારા અલગ અલગ ટીમો બનાવવામાં આવી હતી. 4 પોલીસ ઇન્સ્પેક્ટર સહિત 60થી વધુ પોલીસ કર્મચારીઓ દ્વારા બાળકની શોધખોળ કરવામાં આવી રહી છે.