એસિડ ભરેલી ટેન્કર અને ટ્રક અથડાતા નડિયાદ પાસે ગંભીર અકસ્માત, ટ્રક ચાલકનું મોત

Kheda: અમદાવાદ વડોદરા એક્સપ્રેસ વે પર નડિયાદ પાસે અક્સ્માતની ઘટના સામે આવી છે. એસિડ ભરેલી ટેન્કર પાછળ ઓઈલ ભરેલ ટ્રક અથડાતા અકસ્માત થયો હોવાનું સામે આવ્યું છે. જોકે અકસ્માતમાં ટ્રક ડ્રાઈવરનું ઘટના સ્થળે જ મોત નીપજ્યું છે. ટ્રકના ક્લીનર ગંભીર રીતે ઈજાગ્રસ્ત થતા હોસ્પિટલ ખસેડવામાં આવ્યા છે.

મળતી માહિતી અનુસાર નડિયાદ નજીક એસિડ ભરેલ ટેન્કર પાછળ ઓઈલ ભરેલ ટ્રક અથડાતા અક્સ્માતની ઘટના સામે આવી છે. જેમા એક ટ્રક ડ્રાઈવરનું મોત નીપજ્યું છે. ટેન્કર અને ટ્રક વડોદરાથી અમદાવાદ તરફ જઈ રહી હતી તે દરમિયાન અકસ્માત સર્જાયો છે. જોકે, નડિયાદની ટીમ રેસ્ક્યુ ટેન્ડર વેન અને ફાયર ફાઈટર સાથે ઘટના સ્થળે પહોંચ્યા હતા. ફાયર બ્રિગેડની ટીમે ટ્રકના કેબીનમાં ફસાયેલ ડ્રાઇવર અને ટ્રકના ક્લીનરને કટરની મદદથી પતરું કાપી બહાર કાઢ્યા હતા.

અકસ્માતના પગલે લગભગ એક કલાક સુધી નડીયાદથી અમદાવાદ તરફ જતો વાહન વ્યવહારને બંધ કરાયો હતો. અકસ્માત થતાની સાથે જ એસિડ ભરેલ ટેન્કર લીક થયુ હતું. જે બાદ ફાયર વિભાગે તાત્કાલિક પાણીનો મારો ચલાવી એસિડને ડાયલ્યુટ કરવાની કામગીરી શરૂ કરી હતી. ત્યારબાદ મેઈન લેન બાજુથી વાહનવ્યવહાર શરૂ કરવામાં આવ્યો હતો.