ઇરાન-અમેરિકા યુદ્ધ મામલે ટ્રમ્પનું ચોંકાવનારું નિવેદન – કંઈ પણ થઈ શકે છે!
અમદાવાદઃ અમેરિકાના નવા ચૂંટાયેલા રાષ્ટ્રપતિ ડોનાલ્ડ ટ્રમ્પે ઈરાનને લઈને ચોંકાવનારું નિવેદન આપ્યું છે. ટાઈમ મેગેઝિન સાથેની વાતચીત દરમિયાન ટ્રમ્પને પૂછવામાં આવ્યું કે, ઈરાન અમેરિકા સાથે યુદ્ધ કરે તેવી શક્યતા કેટલી છે? તેના જવાબમાં ટ્રમ્પે કહ્યું કે કંઈ પણ થઈ શકે છે. ટાઈમ મેગેઝીને ટ્રમ્પને પર્સન ઓફ ધ યર તરીકે પસંદ કર્યા છે.
ટ્રમ્પે કહ્યું કે, ‘કંઈ પણ થઈ શકે છે. આ ખૂબ જ અસ્થિર સ્થિતિ છે.’ તેમનું માનવું છે કે અત્યારે સૌથી ખતરનાક સ્થિતિ યુક્રેન દ્વારા રશિયામાં મિસાઈલ છોડવાની છે, જે યુદ્ધને વધુ ખરાબ કરી શકે છે. ઉલ્લેખનીય છે કે, પોતાના પ્રથમ કાર્યકાળ દરમિયાન પણ ટ્રમ્પનું વલણ ઈરાન પ્રત્યે ખૂબ જ કડક હતું. ઈરાનના ઈસ્લામિક રિવોલ્યુશનરી ગાર્ડ જૂથે ટ્રમ્પની હત્યા કરવાની ધમકી આપી હતી, જે બાદ ટ્રમ્પે ઈરાનને કડક શબ્દોમાં ધમકી આપી હતી. જો કે, ઈરાને આ આરોપોને નકારી કાઢ્યા હતા. વર્ષ 2020માં ટ્રમ્પે પોતે ઈરાન વિરુદ્ધ હવાઈ હુમલાને મંજૂરી આપી હતી, જેમાં ઈરાનના ટોચના સૈન્ય કમાન્ડર કાસિમ સુલેમાની માર્યા ગયા હતા.
2015માં બરાક ઓબામાની સરકાર દરમિયાન અમેરિકા અને ઈરાન વચ્ચે પરમાણુ કરાર થયો હતો, પરંતુ વર્ષ 2018માં ટ્રમ્પે તે ડીલ તોડીને ઈરાન પર આર્થિક પ્રતિબંધો લગાવ્યા હતા. જેના કારણે ઈરાન ભારતની યુરેનિયમ સંવર્ધન ક્ષમતામાં ઘટાડો થયો અને તેના પરમાણુ કાર્યક્રમને મોટો ફટકો પડ્યો.
