દિલ્હીમાં મુખ્યમંત્રીના શપથ ગ્રહણ સમારોહની તારીખ-સમય નક્કી!, રામલીલા મેદાનમાં તૈયારીઓ શરૂ
Delhi CM Oath Ceremony: દિલ્હીના મુખ્યમંત્રીનો શપથ ગ્રહણ સમારોહ 20 ફેબ્રુઆરીએ સાંજે 4:30 વાગ્યે યોજાશે. માહિતી અનુસાર, નવા મુખ્યમંત્રી રામલીલા મેદાનમાં મંત્રીમંડળના સભ્યો સાથે શપથ લેશે. જેને લઇને રામલીલા મેદાનમાં તૈયારીઓ શરૂ થઈ ગઈ છે.
શપથ ગ્રહણ અને સરકાર રચના અંગે ભાજપ આજે સાંજે એક બેઠક યોજશે. બેઠકમાં ધારાસભ્ય પક્ષની બેઠકનો સમય અને તારીખ નક્કી કરવામાં આવશે. શપથ ગ્રહણ સમારોહના પ્રભારી વિનોદ તાવડે અને તરુણ ચુગ બેઠકમાં હાજર રહેશે. દિલ્હી ભાજપ પ્રમુખ વીરેન્દ્ર સચદેવા અને દિલ્હી ભાજપ સંગઠનના અધિકારીઓ પણ હાજર રહેશે. આ બેઠકમાં શપથગ્રહણની તૈયારીઓ, બેઠક વ્યવસ્થા અને ગેસ્ટ લિસ્ટને આખરી ઓપ આપવામાં આવશે.
ભાજપે મોટી જીત હાંસલ કરી
5 ફેબ્રુઆરીએ યોજાયેલી વિધાનસભાની ચૂંટણીમાં ભાજપે મોટી જીત હાંસલ કરી છે. પાર્ટી 27 વર્ષ પછી રાષ્ટ્રીય રાજધાનીમાં સત્તામાં આવી છે. દિલ્હી વિધાનસભાની 70 માંથી 48 બેઠકો પર ભાજપે જીત મેળવી. જ્યારે AAP ને 22 બેઠકો મળી. વિધાનસભા ચૂંટણીના પરિણામો 8 ફેબ્રુઆરીના રોજ જાહેર થયા હતા. હવે વિપક્ષી પાર્ટીઓ મુખ્યમંત્રીના શપથ ગ્રહણમાં વિલંબ પર સવાલો ઉઠાવી રહી છે.
આજે જ કાર્યકારી મુખ્યમંત્રી આતિશીએ કહ્યું, “દિલ્હી ચૂંટણીના પરિણામો જાહેર થયાને દસ દિવસ વીતી ગયા છે. દિલ્હીના લોકોને આશા હતી કે શપથ ગ્રહણ સમારોહ 10 ફેબ્રુઆરીએ થશે અને ત્યારબાદ તેમનું કામ શરૂ થશે, પરંતુ જનતા રાહ જોતી રહી. આનાથી સાબિત થાય છે કે ભાજપ પાસે દિલ્હીમાં સરકાર ચલાવવા માટે એક પણ મુખ્યમંત્રી ચહેરો નથી.
મુખ્યમંત્રી પદની રેસમાં કોણ કોણ છે?
મુખ્યમંત્રી પદની રેસમાં પરવેશ વર્મા, ભાજપના દિલ્હી એકમના ભૂતપૂર્વ પ્રમુખ વિજેન્દ્ર ગુપ્તા અને સતીશ ઉપાધ્યાયનો સમાવેશ થાય છે. આ સાથે પવન શર્મા, આશિષ સૂદ, રેખા ગુપ્તા અને શિખા રાય સહિત અન્ય લોકોને પણ મુખ્યમંત્રી પદના દાવેદાર તરીકે જોવામાં આવી રહ્યા છે. પ્રવેશ વર્માએ વિધાનસભા ચૂંટણીમાં નવી દિલ્હી બેઠક પર AAPના રાષ્ટ્રીય સંયોજક અરવિંદ કેજરીવાલને હરાવ્યા છે. તે જાટ સમુદાયમાંથી આવે છે. જોકે, ભાજપના ઘણા નેતાઓ માને છે કે રાજસ્થાન, હરિયાણા, મધ્યપ્રદેશ, ઓડિશા અને છત્તીસગઢની જેમ, ભાજપ નેતૃત્વ નવા ચૂંટાયેલા ધારાસભ્યોમાંથી એક પર દાવ લગાવી શકે છે.
