કેનેડાના PM માર્ક કાર્નીએ બતાવ્યા તેવર, કહ્યું ‘અમેરિકા સાથે ગાઢ સંબંધોનો યુગ પૂરો થયો’
Canada: રાષ્ટ્રપતિ ડોનાલ્ડ ટ્રમ્પે કેનેડા પર ભારે ટેરિફ લાદવાની જાહેરાત કરી છે, જેના પછી કેનેડા અને અમેરિકા વચ્ચેના સંબંધોમાં તણાવ જોવા મળી રહ્યો છે. હવે કેનેડાના વડાપ્રધાન માર્ક કાર્નીએ બંને દેશો વચ્ચેના સંબંધો અંગે મોટું નિવેદન આપ્યું છે. પીએમ કાર્નીએ કહ્યું છે કે કેનેડા અને યુનાઇટેડ સ્ટેટ્સ વચ્ચે મજબૂત આર્થિક, સુરક્ષા અને લશ્કરી સંબંધોનો યુગ પૂરો થઈ ગયો છે.
PM માર્ક કાર્નીએ શું કહ્યું?
PM કાર્નીએ ટ્રમ્પના ઓટો ટેરિફને અન્યાયી ગણાવ્યા અને કહ્યું કે તે દેશો વચ્ચેના હાલના વેપાર કરારોનું ઉલ્લંઘન કરે છે. અમેરિકા અને કેનેડા વચ્ચેના સંબંધો અંગે તેમણે કહ્યું કે ટ્રમ્પે કેનેડાના અમેરિકા સાથેના સંબંધોને કાયમ માટે બદલી નાખ્યા છે. કાર્નીએ અમેરિકા સાથેના સંબંધો સમાપ્ત કરવાની પણ વાત કરી. અમેરિકા સાથેના અમારા સંબંધો અર્થતંત્ર, સુરક્ષા અને લશ્કરી સહયોગ પર આધારિત હતા, પરંતુ હવે અમેરિકા સાથેના અમારા જૂના સંબંધોનો અંત આવી ગયો છે.
કેનેડા બદલો લેશે
કેનેડાના વડાપ્રધાન માર્ક કાર્નીએ કહ્યું કે, કેનેડા ઓટો ટેરિફ સામે બદલો લેશે. અમે અમારી પોતાની પ્રતિક્રિયાત્મક વેપાર કાર્યવાહી દ્વારા યુએસ ટેરિફ સામે લડીશું, જેની યુએસમાં મહત્તમ અસર થશે અને કેનેડામાં ન્યૂનતમ અસર થશે.
લાખો નોકરીઓ જોખમમાં મુકાશે
કેનેડાના વડાપ્રધાનનું આ નિવેદન એવા સમયે આવ્યું છે જ્યારે રાષ્ટ્રપતિ ટ્રમ્પે ટેરિફ વધારવાનો નિર્ણય લીધો છે. ટ્રમ્પે અમેરિકામાં ન ઉત્પાદિત થતા તમામ વાહનો પર 25 ટકા ટેરિફ લગાવવાની જાહેરાત કરી છે. આ નિર્ણય કેનેડાના ઓટો ઉદ્યોગ માટે એક મોટી સમસ્યા સાબિત થઈ શકે છે. ટ્રમ્પના આ નિર્ણયથી કેનેડાના ઓટો ઉદ્યોગમાં કામ કરતા 5 લાખથી વધુ લોકોની નોકરીઓ જોખમમાં મુકાશે. માર્ક કાર્નીએ 14 માર્ચે જસ્ટિન ટ્રુડોના સ્થાને વડાપ્રધાન તરીકેનો કાર્યભાર સંભાળ્યો.
